Olarizuko parkean prospekzio-lanak egin dituzte bi urtez eremu horretako saguzar-espezieak hobeto ezagutzeko, haien kontserbazioan laguntzeko eta esku hartzen duten ekosistemen orekari eusteko.

“Informazio guztia aztertuta, Olarizun nagusi diren espezieak saguzar arrunta, saguzar mediterranearra, Kuhl pipistreloa eta gau-saguzar txikia dira. Lehenengo hirurak ohikoak dira eta oso zabalduta daude Euskal Herrian. Giza kokalekuetara bereziki egokituta dauden espezietzat har daitezke, eta, beraz, normala da hiri-inguruko parke batean aurkitzea, hala nola Olarizuko parkean. Hala ere, nabarmentzekoa da espezie horien eta, bereziki, saguzar arruntaren jarduera handia; horrek adierazten du parke hori ehiza intentsiboko eremua dela”, azaldu du Pascual Borja, Eraztun Berdeko eta Biodibertsitateko zinegotziak.

Bestalde, nabarmentzekoa da gau-saguzar txikien dentsitate handia. Izan ere, espezie arraroa ez den arren, ez da ugaria ingurune horretan, zuhaitzetako zuloetan bizi den espezie migratzailea baita.

12 espezie horiek identifikatuta, Gasteizen dauden 15 kiroptero-tipologia ia guztiak topa daitezke Olarizuko parkean, baita EAEn dauden 25 espezieen erdia ere.

Ugaztun horiek, gainera, zeregin garrantzitsua dute ekosistemen orekari dagokionez, batez ere intsektuak eta beste ornogabe batzuk jaten baitituzte. Saguzar horietako bakoitzak bere pisuaren heren baten eta erdiaren artean jan dezake egunero, eta horrek harrapakinen populazioen kontrol biologiko oso eraginkorra dakar.

“Olarizuko parkean saguzarren komunitate handia dago, baina horietako batzuk mehatxatuta daude. Horrek agerian uzten du eremuak ingurumen-balio handia duela, bereziki, zelaien ondoan dagoen harizti heldu txikiak. Bestalde, animalia horientzat berariaz diseinatutako babes-kaxak jartzeak lagundu egin du zuhaitz gazteegiak dituzten enklabeak populatzen”, zehaztu du Luis Lobok, Eraztun Berdearen eta Biodibertsitatearen Ataleko teknikariak.