Esklerosi Anizkoitza gaixotasun neurodegeneratiboa da eta ez du sendabiderik. Haren ikerketa funtsezkoa da gaixotasun horren aurkako borrokak aurrera egin dezan eta, hartara, esklerosi anizkoitza duten gaixoak sendatuko dituen medikazioa lor dezan. Izan ere, gaixotasun honen sintomak pertsona bakoitza bezain bakarrak dira. Horregatik, mila aurpegietako gaixotasuna deitzen zaio, heterogeneoa delako: pertsona bakoitzak bere erara adierazi eta eboluzionatu dezake. Aurten ere, herritarrak gaixotasunaren inguruan sentsibilizatzeko eta kontzientziatzeko, Vital Fundazioak eta Aemarrek Mójate-Busti zaitez kanpainaren 25. urteurrena ospatzeko ekitaldi nagusia egingo dute igandean, 12:00etan, Estadioaren instalazioetan.
Horrela, eta ildo beretik jarraituz, kanpainaren aurkezpena atzo goizean egin zen Vital Fundazioa Kulturunean, eta bertan izan ziren Arantxa Ibañez de Opacua Vital Fundazioko zuzendaria, Iratxe Asurmendi AEMAReko jardueren koordinatzailea, Emilio Sola Gizarte Politiketako foru diputatua, Marian Olabarrieta Eusko Jaurlaritzako Gizarte Zerbitzuetako zuzendaria eta Livia López Kirol eta Osasuneko zinegotzia. “Orain arte egin diren edizioetan izandako arrakastak eta jasotako babesak sendotu egin dute Udako Ekitaldi Solidario bihurtu den Mójate-Busti zaitez; izan ere, milaka parte-hartzaile eta dozenaka aurpegi ezagun, agintariak eta gizarte, kultura eta enpresa arloetako ordezkariak, besteak beste, esklerosi anizkoitzaren alde busti dira”, prentsaurrekoan ziurtatu zutenez. “Arabako gizartearen eskuzabaltasuna eta elkartasuna egiaztatuta geratu dira, eta gizarte horretan konfiantza dugu, eta harekin batera eskutik jarraitu nahi dugu, sentsibilizatzeko eta Araban 300 pertsona ingururi eragiten dien gaixotasun hori ezagutarazteko, Euskadin 2.200 eta Estatu osoan 47.000 laguni eragiten diena, batez ere emakumezkoei”, gaineratu zuten. Hala, sintomarik ohikoenak hauek dira: nahasmendu sentsitiboak, orekarenak eta hizketarenak; dardarak, gorputz-adarren ahultasuna eta, kasurik larrienetan, horien paralisia; eta alterazio urologikoak, bertigoa, nekea, inurridurak eta ikusmen-alterazioak. “Ez da gaixotasun kutsakorra, ez herentziazkoa, ez hilgarria. Hala ere, gauza asko aldatu dira lehenengo txonbotik. Orduan, ez zuen pronostiko onik, ez medikurik, ez sozialik. Ia ez genekien ezer gaixotasun neurodegeneratibo horri buruz, ez zegoen tratamendurik, ezta gizarteak gaixotasun horrekiko egun duen sentsibilizaziorik ere”. Aurkezpenean azaldu zutenez, gaur egun, egoera erabat “irauli” da, eta dagoen botika mordoak bizi-kalitatea hobetu duten tratamenduak aplikatzea ahalbidetzen du.
Ekitaldia datorren igandean izango da. Zehazki, datorren igandean, 12:00etan izango da Estadio Vital Fundazioaren instalazioetan, baina busti nahi dutenek Aldayeta Klub Nautikoan, Mendizorrotzan eta Gamarran ere egin ahal izango dute. Horietan guztietan neurri zorrotzak hartuko dira, ekintza segurua izan dadin. Parte hartzeko, nahi diren metroak igeri egin behar dira igerilekuko eremu mugatutik. Boluntarioek diploma bat emango diete igerian ari diren pertsona guztiei, esklerosi anizkoitza duten pertsonei laguntzeko ekitaldi sinboliko batean. Gainera, egun osoan zehar, informazioa eman eta diptikoak banatuko dituzte, gaixotasuna zer den eta kanpaina honetan nola parte hartu eta nola lagundu azaltzeko. Elkartean ematen diren errehabilitazio-zerbitzuak finantzatzen laguntzeko dirua biltzeko asmoz, ekimena gauzatuko den lekuetan stand bat jarriko da kanpainaren merchandising-eko hainbat objekturekin, hala nola kamisetak, poltsak, mantalak edo koadernoak. Denek daramate kanpainaren irudia, Katuki Saguyaki enpresaren gidaritzan diharduen Mikel Urmenetak diseinatu eta dohaintzan emana. Gainera, objektu horiek guztiak elkartearen egoitzan ere eskuratu ahal izango dira. Urmenetak busti eta beratzen den arrain bat marraztu du edizio honetarako. Bere hitzetan: “Bi urte gogor daramatzagu pandemiak jota, eta, beste gauza batzuen artean, gure gizarte-ohiturak galdu ditugu, baita kausa jakin batzuen aurrean erakusten genuen bultzadaren eta sentsibilitatearen parte bat ere. 2022 honetan pixka bat gehiago busti behar da, ahal izanez gero”- Kanpaina hori Vital Fundazioak eta Esklerosi Anizkoitzaren Arabako Elkarteak AEMAR duten lankidetza-hitzarmenaren ildotik antolatu da.
Zer da Esklerosi Anizkoitza? Esklerosi Anizkoitza (EA) nerbio-sistema zentraleko gaixotasuna da neurodegeneratiboa eta kronikoa. Burmuineko sustantzia zuriari, sustantzia grisari eragiten die, baita bizkarrezur-muinari ere. EA mekanismo immunitarioen (defentsarako mekanismoak) erantzun anomaloaren emaitza da, indibiduoaren beraren mielinaren proteinen kontrako erantzun ohiz kanpokoaren emaitza. Mielinaren zeregina NSZean programaturiko aginduak organismoaren alde ezberdinetara bidaltzea da. Mielina apurtu egiten denez, burmuinetik, nerbioen bitartez, igorritako seinalea eten egiten da edo baldintza txarretan, gaizki heltzen da. Horrek gaixotasunaren sintoma ezberdinak eragiten ditu. l
