Zorua hobetzeko lanak trafikoa mugatuko du bihar Olagibel kalean

Goizez izango dira murrizketak, eta alternatiba bat emango zaio zirkulazioari Benito Ginea kalearen noranzkoa aldatuz

18.08.2020 | 23:13
Udalak obren utzitako irudia. Argazkia: Utzita

GASTEIZ – Bihar Olagibel kalean —Herrandarren kaletik Judimendi hiribidera bitartean— zirkulazioa etengo dute. Trafikoari egindako mozketa horiek, batez ere, goizean izango dira. Gasteizko Udalak atzo jakinarazi zuenez, lan horiek hirian erabilera handiena duten hamar bideri eragiten dien fimea indartzeko eta hobetzeko kanpainaren ondorio dira.

Izan ere, Udalak proposatutako lehentasunetako bat hiriko hainbat kale nagusi indartzea izan zen, horien artean, Olagibelekoa, eguneroko trafiko handia hartzen duena. Hori dela eta, eta lan horiek egiteko, Udalak atzo jakinarazi zuen trafiko murrizketak goizean izango direla eta, une jakin batzuetan, zirkulazio alternatiba bat jarriko dela Benito Guineak kalearen noranzkoa aldatuz. Hala, egiten ari diren lanek ere aldaketak eragin zituen atzoko trafikoan. Zehazki, Becerro de Bengoa kalean egin zituzten asfaltatze lanak. Oraingo honetan, gidariak ahalik eta gutxien aztoratzeko eta aukera berriak emateko, trafikoa San Antonio kaletik konpondu zen. Zorua sendotu eta hobetzeko kanpainak iraun bitartean, guztira 5.800 metro koadroko azaleran esku hartuko da, eta hiru aste iraungo dute lanek. "Zoladurak fresatuko dira, bigunguneak eta beste akats batzuk konponduko eta, azkenik, asfaltozko aglomeratu beroa botako", adierazi zuen atzo Gasteizko Udalak prentsaohar baten bitartez.

Beste lan batzuk Hauek ez dira hirian egiten ari diren lan bakarrak. Esate baterako, Udalak Zadorra ibaiaren uholdeak prebenitzeko lanetan jarraitzen du, eta horrek ere eragin txikia du trafikoan, errepidearen noranzko batek itxita jarraitzen baitu. Ildo beretik, Uholdeentzako ibilgu bat sortuko da Gamarra Nagusiko zubitik ibaian behera. Xede izango du ibaiaren huste-sekzioa handitzea eta horrela uholde-kota murriztea tarte horretan eta baita ibaian gora jarraian datorren tartean ere. Halaber, erabilera publikorako eremu berde bat egokituko da Zadorra ibaiaren parkean integratua egongo dena eta hiriko eraztun berdearen zati bat diren oinezko zein bizikletentzako pasabideei jarraipena emango diona.