Igerilari bakoitzaren egoera neurtzea eta berriz elkartzea da Arabako Igeriketa Federazioak duela 5 urte Mendizorrotzako 25 metroko igerilekuan larunbatean jokatu zen Igerilari Osoa Torneoa berreskuratzeko helburua. Larunbatekoa ez da txapelketa egiten den aldi bakarra. Urrian, denboraldia hasi berria denean, horrelako txapelketa bat ere egiten da, jendeak entrenamendu-denbora gutxirekin bere forma neurtzeko balio duena. Udaberrikoa, ordea, une egokia da entrenamenduan eta lehiaketan hainbat hilabete eman ondoren egindako aurrerapenak egiaztatzeko. «Urrian igerilariak euren ahalmenen % 50ean daude oraindik, jardute gutxi izan baitute entrenamenduak irailean hasten direlako. Orain une egokia da elkartzeko, jardunaldi entretenigarri batean lehiatzeko eta udako denboraldiari begira nola dauden ikusteko», azaldu du John Mulvey Federazioko presidenteak.

Lehiaketa

Hitzordu horretarako 91 kirolari inguruk eman zuten izena. San Prudentzio zubia zegoela eta, askok ezin izan zuten parte hartu oporretan zeudelako, baina, hala ere, maila oso ona izan zen. Bi distantziatan, 50 eta 200 metrotan, eta lau estilotan lehiatzen da Open San Prudentzio Txapelketa-Arabako Igerilari Osoa. Goizean tximeleta eta bizkar estiloetan igeri egin zuten eta arratsaldean braza eta libre. Azken sailkapena lau estiloen denborak batuta egiten da. 200 metroko distantzian, adin-tarte bakoitzean sailkapenaren buru direnek igerilari osoena dela adierazten duen garaikurra eramaten dute, generoa edozein dela ere. 50 metroko distantzian, aldiz, kategoria bakoitzeko lehen postua lortzeko lehiatzen zen, gizonezkoena eta emakumezkoena.

Lau estilotan eta mistoa

Lehiaketa-sistema honek igeriketako lau estiloen ikusgarritasuna eta lehiaketa mistoa izatearen berezitasuna —lehiaketetan ohikoa ez dena— bateratzeko aukera ematen du. Hala ere, Arabako entitateko presidenteak nabarmendu duenez, «Arabako igeriketaren topaketa honetan garrantzitsuagoa da lau estiloetan lehiatzen diren parte-hatzaile guztien aurrerapenak eta trebetasunak ikustea, lortutako denborak baino». Kasu honetan, Uxue Navarro Judizmendi klubeko igerilariak Arabako 15 urteko marka hobea ezartzea lortu zuen, 200 tximeletan, 2:25.30eko erregistroarekin. Aurreko marka 2018ko 2:30.05ekoa zen.

Garaikurrak

Txapelketa amaitu ondoren, adin bakoitzeko lehen sailkatuei garaikurrak banatu zitzaizkien 200 metrokoan. Haur kategorian Sergio Lizarduyk (2006), Iker Rituertok (2007), Uxue Navarrok (2007), Iris Lizarduyk (2008) eta Nerea Renedok (2009) irabazi zuten. Junior mailan Ainhoa Gotxikoak (2005), Pablo Espejok (2005) eta Maialen Castellanok (2006) irabazi zuten eta senior mailan Saul Herviasek, Menditxokoa, irabazi zuen Menditxo. 50 metroko distantzian, sariak Uxue Alba eta Xabier Nanclaresek eskuratu zituzten, biak Judizmendikoak.