"Mugikortasunaren astean izan garenari, orain garenari eta izan nahi dugun hiriari buruzko hausnarketa egiteko erabiltzen dugu. Etorkizunari leihoa irekiko diogu, hirian zer egin nahi dugun ikusteko". Hitz horiekin ekin zion atzo Gasteizko alkateak, Gorka Urtaranek, mugikortasunari buruzko belaunaldien arteko tailer baten aurkezpenean. Harekin batera, Europako Mugikortasunaren Astea dela eta, Egibideko eta adinekoen zentro soziokulturaletako hogei bat pertsonak hartu zuten parte.
"Askoz hiri osasuntsuagoa eraiki nahi dugu, integratzaileagoa. 8-80ko hiriak; 8 urteko haurrak eta 80 urteko helduak bertan ibili ahal izateko eta espazio publiko horretan berme guztiekin egoteko. Horixe da lantzen ari garen eta hiri honi buruz egin nahi dugun ideia. Ekonomia arloan oso hiri lehiakorra da lanpostu onak sortzeko, gure ongizatea bermatzeko zerbitzu onak ditu, eta planetak klima-aldaketaren aurkako borrokan duen erronkaren parean egongo den hiria", azpimarratu zuen alkateak. Izan ere, hiri lasai eta segurua lortzeko gakoei buruzko belaunaldien arteko lantegi baten ondorioak aurkeztu zituzten atzo udalean gazte eta adinekoek. Gorka Urtaran alkateak bertatik bertara ezagutu zituen adinekoentzako zentro soziokulturaletako eta Egibide ikastetxeko 20 bat lagunek egin duten lantegiko hausnarketa eta eskabideak.
Koroatzeko Bizaneko Marcelina Llamasek eta Egibideko ikasle Sara Pérez Gómezek azaldu zizkioten alkateari hainbat alderdiren inguruan -espazio publikoa, bizikleta, garraio publikoa eta kotxea- ateratako ondorioak. Halaber, mintzaldian goraipatu egin zuten Gasteizek azken 20 urteetan izandako bilakaera, eta hainbat hobekuntza-proposamen egin zituzten datozen urteetarako, bereziki azpimarratuz herritarrak mugikortasun iraunkorraren arloan kontzientziatzeko beharra.
Bestalde, Marcelina Llamasek bere ikuspuntua azaldu zuen, hiriaren onurarako izan daitezkeen hobekuntzei buruz. Alde horretatik, Gasteizi mesede egiteko, herritar guztien lankidetza beharrezkoa dela esan zuen. Maskarak kalera ez botatzeko beharra aipatu zuen adibide gisa. "Lotsagarria da maskarak lurrean botata ikustea, zakarrontziak metro gutxitan edukita", deitoratu zuen. Ildo horretatik, esan zuen ez zaiola ondo iruditzen herritarrek altzariak edo bestelako gauzak zaborretara botatzea eta edukiontzien ondoan uztea, Udalak horrelako zaborrak biltzeko dituen doako zerbitzuak erabili gabe. Halaber, azken urteotan hiriak izan duen bilakaera positiboa ere baloratu zuen. Esan zuenez, 1959an berak hiri txikiagoa ezagutu zuen, eta orain bizitzaz beteta dago. "Guztion errespetua eta laguntza behar da hobetzeko", esan zuen. Bestalde, Sara Pérezek positibotzat jo zuen hiriaren bilakaera-lana. "Hiria hobetzeko modu asko daudela uste dugu, baina dagoeneko hobetzeko bidean gaudela uste dugu",ondorioztatu zuen.
Lana. Hiri lasai eta segurua lortzeko gakoei buruzko belaunaldien arteko lantegi baten ondorioak aurkeztu dituzte gaur udalean gazte eta adinekoek. Gorka Urtaran alkateak bertatik bertara ezagutu ditu adinekoentzako zentro soziokulturaletako eta Egibide ikastetxeko 20 bat lagunek Mugikortasunaren Europako Astea dela eta egin duten lantegiko hausnarketa eta eskabideak.
Lankidetza. Koroatzeko Bizaneko Marcelina Llamasek eta Egibideko ikasle Sara Pérez Gómezek azaldu zizkioten alkateari hainbat alderdiren inguruan -espazio publikoa, bizikleta, garraio publikoa eta kotxea- ateratako ondorioak. Halaber, mintzaldian goraipatu egin zuten Gasteizek azken 20 urteetan izandako bilakaera, eta hainbat hobekuntza-proposamen egin zituzten datozen urteetarako, bereziki azpimarratuz herritarrak mugikortasun iraunkorraren arloan kontzientziatzeko beharra.
