38.100 euro bideratu dira laguntza-proiektuetara

Atzo Gasteizko Udalak berak jakinarazi zuenez, Mundubat Fundazioak eta Mugarik Gabe elkarteak laguntza eskatu dute bi herrialdeetako tokiko erakundeen proiektuak gauzatzeko. Izan ere, erakunde horietan, besteak beste, elikadura, botikak eta uraren kloroa behar dira. “Honduraseko Yoro, Cortes eta Santa Barbara departamentuetan, milioika laguni eragin die, eta egoera hori areagotu egin da Covid-19 pandemiaren ondorioz. 153.000 hektarea soro hondatu edo galdu dira, eta 43.000 pertsona baino gehiago bizi da aterpetxeetan. Elikadurak, jantziak eta garbitasunak dute lehentasuna larrialdi honetan”, helarazi zuten atzo Udaleko kideek prentsa-ohar baten bitartez.

Hala, Mundubat fundazioaren eskaerari 21.771 euroko dirulaguntza ematea onartu du Larrialdietarako Arabako Funtsak. Central Nacional de Trabajadores del Campo tokiko erakundeak elikagai-, biosegurtasun- eta garbiketa-sortak banatuko dizkie zaurgarritasun-egoera berezian dauden 400 nekazari-familiari, baita 400 koltxoneta aterpetxeetan errefuxiatuta dauden pertsonentzat. Bestalde, Alta Verapazeko saila ETA ekaitzak gehien erasandako Guatemalako eremua da, 100.000 pertsona baino gehiago ebakuatu, hornidura elektrikorik ez, komunikaziorik gabeko herriak, 70.000 nekazari kaltetu eta abar dituena. Ildo horretatik jarraituz, Udalaren prentsa-ohar berberean gaineratu zutenez, erdialdeko Amerikako eskualde horrek elikagaiak, oinarrizko sendagaiak eta osasun-neurriak behar ditu, hala nola ura kloratzea. “Horretarako, Larrialdietarako Arabako Funtsak 16.329 euro bideratuko ditu Mugarik Gabe elkartearen bidez”, esan eta erantsi zuten: “Honek, Osasun Zerbitzu komunitarioen Elkartea erabiliko du 900 familiari jaten emateko (arroza, frijola, artoa, azukrea eta olioa), ura desinfektatzeko kloroa hornitzeko eta 450 pertsonari oinarrizko sendagaiak emateko”.