Landa eremuko emakumeen lidergoa balioan jartzeko kanpaina egiten ari dira EAEn

Eusko Jaurlaritzako gobernu kontseiluak oniritzia eman dio Elikadura, Landa Garapena, Nekazaritza eta Arrantza Sailaren eta Mendinet Tokiko Ekintza Taldearekin eta hura osatzen duten landa garapenerako elkarteekin adostutako hitzarmenari, 2026an zehar landa eremuko, nekazari eta arrantzale emakumeen zeregina aitortu eta ikusarazteko kanpaina bat sustatzeko, FAO erakundeak izendatutako Nekazari Emakumearen Nazioarteko Urtearekin bat etorriz.

Jaurlaritzak jakinarazi duenez, martxotik abendura bitartean hainbat eskualde zeharkatuko dituzten hileko ekitaldi eta argitalpenen ziklo baten bidez antolatzen ari da ekimena, eta lehen sektoreari eta landa garapenari lotutako emakumeen esperientziak, proiektuak eta ibilbideak ezagutaraztea, landa mundua herritarrengana hurbiltzea eta ekintzailetzarako zein bizi proiektuak garatzeko aukerak sustatzea da helburua.

Programa martxoan hasi zen, Landaola Sariak ekimenaren barruan, Mendaron (Gipuzkoan), bere protagonistetako bati 'Landa Eremuko Emakumea' saria emanez. Apiril honetan, berriz, 'Enkarterri femeninoan' erakusketa jarri dute ikusgai Gurutzetako metro geltokian, lehen sektoreari lotutako bederatzi emakumeren lana erakutsiz.

Ondorengo hiletan, urtea bukatu arte, beste hainbat jarduera antolatuko dira, besteak beste, Izkiko eta Arabako Errioxako emakume ekintzaileen esperientziei buruzko bideoen zabalkundea, Batxilergoko ikasleekin jardunaldia Berrizko Institutuan landa eremuari lotutako lanbide irteera berriak ezagutarazteko, Arabalanda sarien banaketa, landa eremuko emakumeak ikusarazteko proiektua Gipuzkoan Landaolak eta Kabiak sustatua, Landa Eremuko Emakumeen Nazioarteko Eguneko ekitaldi instituzionala, emakume saregileen ikusarazpena Gipuzkoan eta Emakume Nekazarien Estatutu berriaren aurkezpena.

Elikadura, Landa Garapena, Nekazaritza eta Arrantza Sailak azpimarratu du kanpainaren helburua dela landa eremuko emakumeen lanaren gizarte aitorpenean eta lurralde ehunaren sendotzean eragin positiboa sortzea, lankidetza sareak eratzea sustatuz, emakumeek gidatutako proiektuak zabalduz eta landa eremuak ekintzailetzarako eta berrikuntzarako duen potentziala erakutsiz.