Bilboko Udaleko Osasun eta Kontsumo Sailak Elkar Eginez Euskadiko Adikzioen Jardunbide Onenaren 2024-2026 aldiko saria jaso du Kerik gabeko Zorrotza proiektu komunitarioagatik. Zorrotza auzoan tabakoaren kontsumoa desnormalizatzera eta kerik gabeko espazioak sustatzera bideratutako ingurumen prebentzioko ekimena da saritua.
Alvaro Perez Osasun eta Kontsumoko zinegotziak asteazken honetan saria jasotzean azpimarratu duenez, "aintzatespenak lan komunitarioaren eta parte hartzailearen balioa indartzen du, adikzioak prebenitzeko funtsezko tresna den aldetik, bai eta Udalak herritarrentzako ingurune osasungarriagoak eta babesgarriagoak sustatzeko daukan konpromisoa ere".
Kerik gabeko Zorrotza parte hartze komunitarioko prozesu zabal baten bidez ingurumen prebentzioko ekintzak sustatzen dituen proiektua da
Era berean, zinegotziak horrelako jarduerak bultzatzen jarraitzeko konpromisoa berretsi du: "Eskura dauzkagun baliabide guztiekin, Bilboko biztanleen osasuna zaintzeko eta hobetzeko, baita adikzioak bezalako eremu korapilatsu eta konplexu batean ere".
HARTZE KOMUNITARIOA
Kerik gabeko Zorrotza parte hartze komunitarioko prozesu zabal baten bidez ingurumen prebentzioko ekintzak sustatzen dituen proiektua da. Lan horri esker, handitu egin da gizarte sentsibilizazioa, eta aurrera egin da auzoan tabako kerik gabeko gune berriak sortzeko bidean.
Ekimena Zorrotzan jarri zen abian 2023an. Auzo horretan, gizarte sarearen sendotasuna eta elkarte sare sendoa nabarmentzen dira. Harrezkero, sentsibilizazio, informazio eta prestakuntza jarduerak egin dira lehen eta bigarren hezkuntzako ikastetxeei, familiei, osasun zentroari, saltokiei, gizarte eta hezkuntza elkarteei eta erretiratuen elkarteei zuzenduta, tokiko beste eragile batzuen artean.
