Euskalmet euskal meteorologia agentziaren iragarpenaren arabera, ostegunean, maiatzaren 23an, egunak aurrera egin ahala giroa egonkortuz joango da. Goizean eta arratsaldeko lehen orduetan han-hemenka zaparrada txiki batzuk bota ditzake, bereziki ipar partean. Alabaina, egunak aurrera egin ahala, giroa egonkortu eta hodeitza arinduz joango da, eta arratsaldean ostarte politak irekiko dira.
Haizeak mendebal/ipar-mendebaldetik joko du eta tenperatura maximoak aurreko egunetako maila berdintsuan geldituko dira. Hiriburuetan, Baionan 12 gradu espero dira gutxienez eta 17 gehienez, Bilbon 12 gutxienez eta 19 gehienez, Donostian 11 gutxienez eta 18 gehienez, Gasteizen 7 gutxienez eta 17 gehienez, eta Iruñean 8 gutxienez eta 17 gehienez.
Itsasoan mendebal-osagaiko haizea ibiliko da, arratsaldean ipar-mendebaldekoa nagusituz, 3-4ko indarrarekin, eta itsaskirria edo itsaskia eragingo du. Ipar-mendebaldeko hondoko itsasoak 1-1,5 metro arteko olatuak altxatuko ditu. Itsasgorak 05:13an eta 17:31n izango dira, eta itsasbehereak 11:01ean eta 23:37an. Uraren tenperatura 15 gradukoa da eta ikuspena lau eta hamar kilometro artekoa izango da.
Balorazioa
"Zerua tarteka hodeitsu egongo da; arratsalde-gauean hodeiak gutxitu egingo dira eta egunaren amaieran zerua partez hodeitsu geldituko da. Goizaldean baliteke noizbehinka zaparrada txikiren bat botatzea kostaldean; arratsaldean noizbehinka zaparrada txikiak botako ditu. Mendebal-osagaiko haizea ahul-bizi ibiliko da, kostaldean goizaldean bolada gogorrekin; goizean ipar/iparmendebaldetik finkatuko da. Tenperaturan aldaketarik ez", azpimarratu zuten.
