Arabako Minbiziaren aurkako Elkarteak eta Euskal Herriko Unibertsitatea (EHU) lankidetza hitzarmen bat sinatu dute Minbiziaren Aurkako Ikaskuntza-Zerbitzua Gela sortzeko. Arabako campuseko Errektoreordetzan izango du egoitza, Gasteizen, Unibertsitate-Enpresa eta Ikaskuntza-Zerbitzua gelen eremuan, eta bere helburua izango da prestakuntza, ikerketa eta dibulgazio jarduerak egitea minbiziaren prebentzioaren eta biziraupenaren inguruan.
Manoli Igartua Olaechea EHUko Arabako campuseko errektoreordeak eta Miren Lourdes Bilbao Larrauri Arabako Minbiziaren aurkako Elkarteko presidenteak izenpetu dute bi erakundeen arteko lankidetza hitzarmena, astelehen honetan. Hitzarmena sinatu ondoren, batzorde mistoa bildu da urteko jarduera plana adosteko.
Helburua izango da prestakuntza, ikerketa eta dibulgazio jarduerak egitea minbiziaren prebentzioaren eta biziraupenaren inguruan.
Azken urteetan, EHUko Arabako campuseko Farmazia Fakultateak, Hezkuntza eta Kirol Fakultateak eta Lan Harreman eta Gizarte Langintza Fakultateak interesa erakutsi dute lankidetzan aritzeko Arabako Minbiziaren aurkako Elkartearekin minbiziaren aurkako ikerketan, minbiziaren prebentzioari buruzko hezkuntzan, bizi ohitura osasungarrien sustapenean, jarduera fisikoan eta nutrizioan, eta pazienteentzako eta haien familientzako laguntza psikosozialean.
Hitzarmena sinatu da lankidetza esparru bat eta oinarri batzuk ezartzeko bi erakundeen artean
Hori dela eta, hitzarmena sinatu da lankidetza esparru bat eta oinarri batzuk ezartzeko bi erakundeen artean, Minbiziaren Aurkako Ikaskuntza-Zerbitzua Gela sortze aldera. Gela berriaren helburua izango da prestakuntza, ikerketa eta dibulgazio jarduerak egitea minbiziaren prebentzioaren eta biziraupenaren alorrean.
"Gela hau sortuz, ikaskuntza-zerbitzua bultzatu nahi dugu, prestakuntza gizarte konpromisoarekin uztartzen duen metodologia. Estrategia berritzaile horren xedea da gure ingurunearen benetako beharrei erantzutea, esperientzia bereizgarriak eskainiz gure ikasleei", azaldu du Igartuak.
Gaineratu duenez, "gure ikasleek zerbitzu bat eskainiko diote gizarteari, kasu honetan, Minbiziaren aurkako Elkartearekiko elkarlanaren bidez. Gainera, lagungarri izango da minbiziari buruzko gure ikertaldeen ikerketa bultzatzeko, lankidetza hitzarmen espezifikoak sinatuta".
Zehazki, akordioaren bidez, prestakuntza, ikerketa eta ezagutzaren dibulgazioa sustatzeko ekintzak antolatu nahi dira minbiziaren aurkako borrokan, bai eta azterlan eta ikerketa lan akademikoak ere, hezkuntza lankidetzarako programen (borondatezko praktikak), gradu eta master amaierako lanen eta doktorego tesien bidez ('industria doktoregoa' aipamena duten tesiak batez ere).
Era berean, jardunaldiak, bisitak, mintegiak eta prestakuntza ikastaroak antolatuko dira bi erakundeen artean, Araban minbiziaren prebentzioari, arretari eta ikerketari loturiko ezagutza sortzen eta zabaltzen laguntzeko. Azkenik, ikasleak bultzatuko dira elkartearen boluntariotza lanetan aritzera, eta haren jarduerak zabalduko dira EHUko kideen artean.
