BILBO. Jaurlaritzak milioi bat euro zuzendu ditu saltokiek zerbitzu pertsonalizatua, doakoa, neutroa eta profesionala jaso ahal izateko aholkularitzaren eta ezarpen teknologikoaren arloan, eta Euskadiko txikizkako merkataritzan online salmenta bultzatu ahal izan dezaten, Eusko Jaurlaritzar ohar bidez jakinarazi duenez.
SPRIk Ecommerce programaren bidez gauzatzen du jarduera hau, eta saltokiei eskaintzen zaie, eskaera egiten duen dendaren profil teknologikoaren arabera, merkataritza elektronikoaren esparruan dauden lau mailetako edozeini heltzeko aukera.
Halaber, aurtengo lehenengo hilabeteetan 400 online saltoki ezarri dira dagoeneko, eta espero da urte bukaerarako 800 saltoki txiki izatea soluzio digital honekin online merkatuan lehiatzen.
Maila definitzen da Ecommerce programaren laguntza eskatzen duen saltokiaren diagnostikoa eginda. Eskatzaile bakoitzak online ingurunean dituen helburuak identifikatzen dira eta bakoitzari ongien egokitzen zaizkion zerbitzuak esleitzen dira. Zerbitzu hauek lau multzotan biltzen dira: Ecommerce ezarpena,Ecommerce optimizazioa, Sare sozialetan salmenta eta Kanpoko webetan salmenta.
Alde batetik, "Ecommerce ezarpena" packa online presentzia duten baina e-commerce ez duten saltokiei zuzenduta dago. Izena emanda dauden txikizkako saltokien %40 une hauetan online saltoki bat dute Merkataritza Elektronikoaren programari esker.
Bestetik, "Ecommerce optimizazioa", alegia, e-commerce ezarrita duten baina online salmentak sustatzeko hobekuntzak egin beharrean daudenei zuzenduta dago. Izena emanda dauden saltokien %4 egin dituzte hobekuntzak, besteak beste, posizionamendu organikoan eta erabilgarritasunean.
"Sare sozialetan salmentak" da eskaintzen den hirugarren aukera edo planteamendua. Izena emanda dauden eta e-commerce soziala ezartzeko profil sozial nabarmendua duten saltokien %48, hau da, gehienak, izan dira salmentak sare sozialen bidez egiteko proposamenaren onuradunak. Proposamen honi esker online egin daitezke salmentak nork bere saltokia sortu beharrik izan gabe.
Azkenik, kanpoko weben bidez saltzeko moduko produktuak dituzten saltokiei zuzendutako laguntzen packa dago. Multzo honetan sartzen dira plataforma kolektiboak, saltoki handi espezializatuak eta salmenta bertikaleko plataformak, eta halakoak izan dira arrisku handirik hartu gabe merkatu elektroniko berrietan sartzeko aukeraz baliatu direnak. Izena eman duten saltokien %8 heldu dio bide honi.
ONLINE SALMENTAK
Bestalde, Euskadin txikizkako 25.535 saltoki daude, eta, Ikusmer-Merktaritzaren Behatokiaren datuen arabera, %12,5ek saltzen dituzte bere produktuak Internet bidez, eta salmenta gehienak, %90, alegia, euren webguneen bidez egiten dituzte.
Sektoreei dagokienez, moda saltzen duten dendak eta etxeko osagarriekin zerikusia dutenak dira aktiboenak e-commercean, nahiz eta ez diren % 17ra iristen modaren kasuan eta % 13ra etxeko osagarrien kasuan.
