Noka Ekoizpena programan ari diren emakume zinemagileek beren proiektuak garatzeko azken hilabeteei ekin diete, eta joan den ekainaren 19an Donostiako Tabakaleran egindako laugarren moduluak proiektuak garatzeko oinarrizko alderdi sortzaile, juridiko eta ekonomikoetan sakondu zuen, irailean izango den azken saioaren aurretik.
Modu honetan, Zineuskadi elkartetik jakinarazi dutenez, emakume zuzendari eta ekoizle hasiberriek beren film luzeen garapenean urratsak ematen jarraitzen dute, proiektuen dimentsio sortzailea, ekoizpena eta bideragarritasuna indartzen laguntzen dieten profesionalek lagunduta. Edizio honetan hautatutako proiektuak Yangxi Chen zuzendariaren eta Esmeralda Bravo ekoizlearen 'Gure etxea' eta Esther Vital zuzendariaren eta Aline Rajan-Harjanirena ekoizlearen 'If I die' dira.
Ekainaren 19ko jardunaldia banakako lan saioekin hasi zen, proiektu bakoitzaren egoera aztertzeko eta programaren azken faseari begira hurrengo pausoak zehazteko. Ikus-entzunezkoen sektoreko hainbat profesionalek hartu zuten parte, eta proiektuak garatzeko funtsezko tresnak eta ezagutzak partekatu zituzten.
Silvia Ruiz lege aholkulariak jabetza intelektualarekin, egile eskubideekin eta pizgarri fiskalekin lotutako gaiak jorratu zituen. Ondoren, gidoiaren eta zuzendaritzaren arteko harremana aztertzeko aukera izan zuten parte hartzaileek, Andrea Jaurrieta zuzendariaren eskutik.
Noka Ekoizpenak denbora, espazioa, testuingurua eta laguntza profesionala eskaintzen dizkie zuzendari eta ekoizleei. Programaren helburuetako bat da aurrekontu egokiak prestatzea Eusko Jaurlaritzaren eta Espainiako Kultura Ministerioaren Zinema eta Ikus-entzunezkoen Institutuaren diru laguntzak eskatzeko, baita nazioarteko zinema industriako beste foro profesional batzuetara aurkezteko ere. Horrez gain, parte hartzaileek ekoizpenaren plangintza egiteko laguntza jasoko dute, filmatzen hasi ahal izateko.
Prozesua Abycine Lanza zinema independentearen profesionalentzako erreferentziazko merkatuan egingo den 'pitch' profesional batekin amaituko da. Hain zuzen ere, Noka Ekoizpenaren lehen edizioan parte hartu zuten bi proiektuek sariak jaso zituzten merkatu horretan: 'Canción Animal' filmak ECAM Forum saria irabazi zuen, eta 'La Koreana' lanak Porto Post Doc saria.
