Europako 100 bat ordezkarik Tonpoiko berreskuratze lanen proiektua ezagutu dute Bermeon

Europako hainbat herrialdetatik iritsitako 100 teknikari eta politikari inguruk bisita egin dute Bermeora (Bizkaia) Tonpoi inguruko berreskuratze proiektua bertatik bertara ezagutzeko. Jarduera Ihobe sozietate publikoak antolatutako jardunaldien barruan egin da, LIFE programaren eta Urban Klima 2050 ekimenaren esparruan.

Bermeoko Udaletik jakinarazi dutenez, Nadia Nemeh Shomaly alkateak eta Zigor Uriondo Arrue Ingurumen zinegotziak egin diete harrera bisitariei, eta ibilbidea Talan hasi ondoren, Tonpoira bertaratu dira. Bertan, udal ordezkarien eta teknikarien azalpenak jaso dituzte europar ordezkariek, egindako esku hartzearen xehetasunak ezagutzeko.

Tonpoiko eraldaketa LIFE Urban Klima 2050 proiektuaren barruan garatu da, klima aldaketara egokitzeko jardunbide egokien adibidetzat. Esku hartzearen bidez, biodibertsitatea indartu da, itsasbazterra lehengoratu da eta herritarrentzat berdegune erresiliente eta irisgarri bat sortu da.

Leheneratze lanak egin aurretik, eremua degradatuta zegoen, baratzeek, behin-behineko eraikinek eta bestelako egitura irregularrek okupatuta. Gainera, landaredi inbaditzailea eta kontrolik gabeko hondakinak zeuden. Eremuaren ezaugarri geografikoek -itsasoarekiko hurbiltasuna eta malda handia- arrisku handia eragiten zuten lur jausien aurrean, bereziki euri jasa handien eta olatu bortitzen ondorioz.

Esku hartzearen bidez, 1,4 hektareako gune berde bat sortu da herrigunetik gertu. Guneak itzalpeko espazioak eskaintzen ditu eta Aritzatxu hondartza herrigunearekin lotzen du oinezkoentzako ibilbide baten bidez. Orain arte, proiektuak ia 600.000 euroko inbertsioa izan du. Horretarako, Bermeoko Udalak 425.000 euroko diru laguntza jaso du, LIFE Urban Klima 2050 programaren, Eusko Jaurlaritzaren eta Kosta Mugapearen laguntzarekin.

Bermeoko alkateak adierazi du "harro" dagoela egindako lanarekin, eta azpimarratu proiektuak herritarren eta bisitarien bizi-kalitatea hobetu duela. Era berean, esan du Bermeon garatutako eredua beste udalerri batzuentzat erreferente bihurtzen ari dela. Hala ere, zehaztu du proiektua ez dagoela amaituta, hirugarren fasea gauzatzeke baitago finantzaketa faltagatik.

"Esku hartze honen bidez, ingurumen berreskuratzetik harago, oinezkoentzako ibilbide bat sortu da, herritarrek ingurune natural batean ariketa egiteko aukera izan dezaten, klima aldaketara egokituta eta zarata zein kutsaduratik urrun", azaldu du.