Gasteizko Udaltzaingoko agenteek 44 eta 31 urteko bi gizonezko atxilotu ditu asteburuan genero indarkeriaren esparruan bikotekideei lesioak eragitea leporatuta, polizia kidegoak astelehen honetan jakinarazi duenez.
Hain zuzen, joan den ostiralean, apirilaren 17an, herritarren segurtasuneko lanak egiten ari zen patruila bati Zaramaga auzoko atari batera joateko eskatu zioten 22:00ak inguruan, gizon batek emakume bati eraso egin ziolako.
Bertaratu ziren agenteek gizon bat ikusi zuten Legutioko Aterantz korrika eta gelditzeko agindu zioten. Une horretan, gertaeren lekuko bat iritsi zen eta erasoaren berri eman zien agenteei. Patruila biktimarekin elkarrizketatu zen, eta aurpegian markak zituela ikusi zuen. Ustezko erasotzailearen bertsioa entzun ondoren, 44 urteko gizonezkoa atxilotu egin zuten.
Bestalde, larunbatean, apirilaren 18an, 21:00ak aldera, herritarren segurtasunerako lanak egiten ari zen patruila bati Aranbizkarra auzoko etxebizitza batera joateko eskatu zion koordinazio zentralak, gizon bat bertan zeuden pertsonei eraso egiten ari zitzaielako, oso oldarkor.
Udaltzainak berehala bertaratu ziren eta gizonaren bikotekidearekin, ahizparekin eta beste senide batekin hitz egin zuten, baita ustezko erasotzailearekin ere. Antza denez, gizonak eztabaida bat izan zuen bi emakumeekin familia arrazoiengatik, eta bikotekideari eraso egin zion, baita ahizpari ere, bien artean jarri baitzen defendatzeko asmoz. Biktimak esandakoak kontuan izanda eta zituen lesioak ikusita, patruilak 31 urteko gizonezkoa atxilotu zuen.
