Mahasti Artean gastronomia eta kultur jaialdia egingo da asteburuan Urdaibain

Bizkaiko Txakolina jatorrizko deiturak eta Urremendi garapen elkarteak antolatutako Mahasti Artean gastronomia eta kultur jaialdiaren seigarren edizioa egingo da asteburuan Urdaibain (Bizkaia), ardoa, gastronomia, kultura, natura eta jasangarritasuna uztartuko dituen proposamenarekin.

Antolatzaileek jakinarazi dutenez, Morgan dagoen Talleri Berria upategia izango da jardueren erdigunea, kontzertu, komedia, yoga eta esperientzia gastronomikoekin, "paisaia bikainenez inguratuta".

Jon Plazaola aktoreak hasiko du jaialdia, ironia eta umorez betetako 'Tum-Tum, Platz!' bakarrizketarekin, ostiralean, irailaren 5ean. Bizkaiko lau txakolin eta Idiazabal gazta dastatzeko aukera ere izango da.

Larunbatean, irailaren 6an, Nerea Izurieta irakasleak yoga saio bat gidatuko du goizez mahastiari begira, eta ondoren dastaketa marinatua egingo da. Gauean musikak hartuko du lekukoa, aire zabalean arituko diren Mikosis eta Belako taldeeekin, txakolin eta Idiazabal gazta dastaketa barne.

Azkenik, igandean, irailaren 7an, mahastietan egingo den Mahasti Gourmet ekimenarekin bukatuko da jaialdia: esperientzia gastronomikoa, DJ Txuck Turnerren musika eta Urdaibaiko Esentziak pintxoak.

Ekintzetarako azken sarrerak www.bizkaikotxakolina.eus. webgunean daude eskuragarri. Bilbo, Larrabetzu, Gernika eta Muxikatik irteerak izango dituen joan-etorriko autobus zerbitzua izango da jaialdiko egun bakoitzerako, eta sarrera erosten denean erreserbatu ahal izango da. Garraio publikoan joan nahi dutenek Morgarekin lotzen diren Bizkaibuseko lineak erabil ditzakete (A3526 eta A3533).