Donostiako Udalak jakinarazi du mantentze lanak egingo dituela Gladys del Estal pasabidean ostegunetik igandera, irailaren 4tik 7ra, eta, beraz, pasabidea bera zein igogailua itxita egongo direla.

Zehazkiago, gainazala presiozko urarekin garbituko da, desinkrustatzaile bereziak aplikatuko dira zuraren gainazaleko geruzako hondakinak ezabatzeko, eta asetasun bidezko konposatu irristagaitza duen olio babeslea aplikatuko da zura elikatzeko eta irristaden aurrean haren segurtasuna bermatzeko.

Tratamendu irristagaitzaren helburua gainazalaren itsaspena hobetzea da, hezetasun baldintzetan bereziki, eta istripuak prebenitzea oinezkoen joan-etorri handia duen azpiegituran. Egurra babesteaz gain, erabiltzaileen segurtasuna indartzen duen soluzio teknikoa da.

Lanon kostua 6.000 eurokoa da eta ekainean egindako esku hartzeei gehitu behar zaie; orduan, 11.000 euro inbertitu ziren kaltetutako zurak ordezkatzeko. Jarduera guztien helburua da pasabidearen bizitza baliagarria luzatzea eta erabilera baldintza optimoei eustea herritarrentzako funtsezko konexio puntu batean.

BESTE GAI BATZUK

Bestalde, Soziolinguistika Klusterrak eta Euskal Herriko Unibertsitateak (EHU) irailaren 22an itxiko dute Txillardegi-Hausnartu soziolinguistika sarien 18. ediziora hausnarketa eta ikerketa lanak aurkezteko epea.

Sustatzaileek jakinarazi dutenez, 2008. urtean sortu zenetik, lehiaketaren helburu nagusiak dira euskal soziolinguistika teorikoa eta metodologikoa garatzea eta berritzea, euskal soziolinguistikaren ikertzaileen lana bultzatzea eta ikertzaile berriak eremu honetara biltzea.

Euskararen soziolinguistika arloko ikerketa zein hausnarketa lanak aurkez daitezke, betiere oinarri zientifikoa badute edota zientzian oinarritutako hausnarketak proposatzen badituzte.

Diziplina askotatik proposatutako lanak izan daitezke, gainera, hala nola soziologiatik, hizkuntzalaritzatik, zientzia politikoetatik, psikologiatik, antropologiatik, komunikazio zientzietatik edo bestetik.

Bada, lanak aurkezteko epemuga irailaren 22a izango da. Lehen saria 2.000 euro eta Jose Luis Zumetaren litografia bat izango da, bigarrena 1.300 euro eta hirugarrena 1.000 euro.