Hauspoz Euskal Herriko Akordeoi Elkarteak antolatzen duen Topakord gazteentzako akordeoi topaketaren laugarren edizioa egingo da Arantzazuko Aterpetxean eta Gandiaga Topagunean ostegun honetatik igandera, uztailaren 3tik 6ra, eta lurralde osoko 40 ikaslek parte hartuko dute, "musika proposamen bizia, parte hartzailea eta publikoari irekia partekatzeko".
Antolatzaileek jakinarazi dutenez, Topakord "esperientzia intentsiboa eta kolektiboa" da, non ikaskuntza, sorkuntza eta elkarbizitza musikaren bidez uztartzen diren.
Lau egunez, ikasleek orkestra entsegu desberdinetan parte hartuko dute, eta, horrez gain, Dalcroze Metodoan oinarritutako gorputz adierazpen saioak (Maite Bilbao irakaslearen eskutik), jarduera kolektiboak, irteera kulturalak eta kontzertuak antolatuko dira.
Topaketako orkestra Txaber Fernandez zuzendariaren gidaritzapean arituko da, eta musika klasikoa, tradizionala eta garaikidea uztartzen dituen errepertorio zabala landuko du.
Errepertorioan izango da Lucien Danzeisen suitzarraren obra berri baten erabateko estreinaldia, Hauspoz elkarteak antolatzen duen Francisco Escudero Nazioarteko XVII. Akordeoi Konposizio Lehiaketako irabazlea, alegia.
"Topakordek musika formakuntza integralaren aldeko apustua egiten du, garapen tekniko eta interpretatiboaz gain, sormena, elkarbizitza eta talde lana ikaskuntza prozesuaren funtsezko balio gisa bultzatuz", adierazi dute elkarte antolatzailetik.
Era berean, hiru kontzertu antolatu dira: Mateja Zenzerovic akordeoi jotzaile gonbidatuarena ostiralean Arantzazuko Santutegiko Hotelean, Topakord Masterreko ikasleena larunbatean Arantzazuko Aterpetxean, eta topaketaren orkestraren amaierako kontzertua igandean Oteiza auditoriumean.
