Ertzaintzak eta Guardia Zibilak telefonia kontratuekin eta gailu elektronikoen salerosketarekin iruzur egiten aritzen zen talde bat desegin dute eta 12 pertsona atxilotu dituzte Bizkaian eta Burgosen. Gainera, hiru miaketa egin dituzte Barakaldon, Bilbon eta Miranda de Ebron.
Eusko Jaurlaritzako Segurtasun Sailak jakinarazi duenez, 'Anitz-Cigansky' operazioa elkarrekin garatu dute Bilboko ertzain-etxeak eta Arabako Polizia Judizialaren Unitate Organikoak, Terrorismoaren eta Krimen Antolatuaren aurkako Inteligentzia Zentroak koordinatuta, eta kapitalak zuritzen, dokumentuak faltsutzen, iruzur egiten eta egoera zibila usurpatzen aritzen zen talde kriminal bat desegitea lortu dute.
Ikerketen zati bat joan den martxoan hasi zuten Bilboko ertzain-etxean, hiriko salerosketa establezimendu batean pertsona batzuek egin behar zuten eta agenteen susmoak piztu zituen salmenta baten ondorioz.
Ikertu ondoren, jakin ahal izan zuten pertsona horiek produktu teknologikoak eskuratzen zituztela Interneten bigarren eskuko salerosketa aplikazioen bidez, legez kanpo eta ordaindu gabe edo, engainuen bidez, sinestaraziz produktu horiek, oker baten ondorioz, adostutakoa baino garestiago erosi zituztela eta ustez gehiago ordaindutakoaren balioko transferentziak jasoz. Gero salerosketa establezimendu fisikoetan saltzen zituzten produktuak.
Ikerketan zehar, Terrorismoaren eta Krimen Antolatuaren aurkako Inteligentzia Zentroak hauteman zuen Ertzaintzaren 'Anitz' operazioa
Martxoan bertan, Guardia Zibilaren Arabako Komandantziako Fiskaltza eta Mugetako Patruilaren ohiko ikuskapen batean, pakete bidalketa susmagarriak antzeman zituen Miranda de Ebroko helbide batera, haien artean itxuraz harremanik ez zuten hainbat pertsonaren izenean.
Beste datu batzuk
Ikerketan zehar, hasieran egiaztatu zuten talde kriminal bat identitate usurpatuak erabiltzen ari zela telefonia mugikorreko kontratuak iruzurrez formalizatzeko, gama altuko gailuak lortuz (telefonoak, tabletak, telebistak eta abar).
Bada, ikerketan zehar, Terrorismoaren eta Krimen Antolatuaren aurkako Inteligentzia Zentroak hauteman zuen Ertzaintzaren 'Anitz' operazioa eta Guardia Zibilaren 'Cigansky' operazioa bat zetozela. Bi ikerketetan bat zetozen ustezko egileak, ikertutako legez kontrako egintzak egiteko erabilitako helbideak eta ustezko biktimen identitateak usurpatzeko erabilitako dokumentazio batzuk.
Identitate usurpazio horiek kalte larria eragiten zieten biktimei, konpainiekin zorpetuta geratzen baitziren jakin gabe, eta berankorren fitxategietan alta ematen baitzitzaien. Egoera horrek erabateko babesgabetasun egoeran jarri zituen biktimak, epaiketetarako ere deitu baitzituzten, eta kasuren batean haietako batzuen aurkako bilaketa seinalamenduak ere eman baitziren.
Hori dela eta, erabaki zen ikerketak elkarrekin egitea bi polizia kidegoetako unitate operatiboen artean elkarlanean jarduteko 'Anitz-Cigansky' izeneko baterako operazioaren barruan.
