Eusko Jaurlaritzak eta Arabako, Bizkaiko eta Gipuzkoako foru aldundiek Turismo Jasangarriaren aldeko Ituna sinatu dute turismo eredu etikoa, orekatua eta jasangarria indartzeko. Hain zuzen, administrazioen arteko koordinazioa eta lankidetza indartzea da asmoa, jasangarritasunean, bizikidetzan eta lurraldearen orekan oinarritutako Euskadiko turismo eredua sendotzeko.
Javier Hurtado Jaurlaritzako Turismo, Merkataritza eta Kontsumoko sailburuk, Cristina Gonzalez Arabako diputatu nagusiorde eta Enplegu, Merkataritza, Turismo eta Foru Administrazioko diputatua, Sonia Perez Bizkaiko Garraio, Mugikortasun eta Turismoko foru diputatuak eta Azahara Dominguez Gipuzkoako Mugikortasun, Turismo eta Lurralde Antolaketako foru diputatuak sinatu eta aurkeztu dute akordio instituzionala, astelehen honetan Gasteizen egindako ekitaldian.
Bertan azaldu dutenez, akordioak arreta berezia jarriko du erakundeen arteko koordinazioan, sustapen turistikoan eta datuetan oinarritutako adimen turistikoan. Horrela, lau erakundeek elkarrekin lan egingo dute baliabideak optimizatzeko, tresnak partekatzeko eta bisitarien profilaren eta portaeraren azterketa hobetzeko, datu turistikoen behatokien eta plataformen bidez.
Gainera, itunak hainbat arlotan lankidetza indartzea aurreikusten du, besteak beste, produktu turistikoen sorkuntzan, berrikuntzan, eraldaketa digitalean eta jasangarritasun sozial, ekonomiko eta ingurumenekoari buruzko sentsibilizazioan, ondorioztatu dute Eusko Jaurlaritzatik egindako prentsa ohar baten bitartez.
