NARE programak Kolonbiako eta Ekuatore Gineako giza eskubideen hiru defendatzaile hartu ditu

NARE Eusko Jaurlaritzaren Giza Eskubideen Defendatzaileak Babesteko Programak Kolonbiatik eta Ekuatore Gineatik heldutako hiru emakumezko hartu ditu. Hiru ekintzaileak lurraldearen eta sexu aniztasunaren defentsan lan egiten ari dira, eta aldi baterako hartu dituzte Euskadin, beren herrialdeetan jasaten dituzten jazarpen eta mehatxuek eragindako higadura fisiko eta emozionaletik errekupera daitezen eta babes eta elkartasun politikorako sareak handitu ditzaten.

Zehazki, Jaurlaritzatik jakinarazi dutenez, Anaidalyt Delgado Lezama Kolonbiako gatazka armatuaren biktimen aldeko borrokan inplikatuta dagoen gizarte lider eta Antioquiako Desplazatuen eta Emakumeen Elkarteko kidea, eta Maria Isabel Obono Obama Mangue eta Maria Esther Mbang Nguema Mangue Ekuatore Gineako LGTBIQ+ populazioaren giza eskubideen aldeko ekintzaileak dira hiru ekintzaileak.

NARE programak Kolonbia, El Salvador, Honduras, Guatemala, Peru, Nikaragua edo Mendebaldeko Saharatik heldutako giza eskubideen 42 defendatzaile hartu ditu 2011tik, eta aurten lehen aldiz hartu ditu Ekuatore Gineako pertsonak.

Programaren helburua da haien jatorrizko herrialdeetan giza eskubideen eta gizarte justiziaren defentsan egiten duten jardueragatik bizitza edo integritate fisiko eta emozionala arriskuan duten pertsonak babesten laguntzea, eta, horretarako, sei bat hilabetez Euskadin hartzea.

Denbora horretan, defendatzaileek agenda politikoa garatzen dute hainbat erakunde publikorekin eta gizarte erakunderekin, nazioarteko laguntza sareak ehundu eta indartze aldera. Sare horiek haien herrialdeetara segurtasun baldintza handiagoetan itzultzen lagunduko diete, baita haien jatorrizko herrialdeetan giza eskubideen defentsan lanean jarraitzen ere.

Eusko Jaurlaritzako Giza Eskubideen eta Biktimen Arretarako Zuzendaritza da NARE programaren buru, eLankidetza Lankidetzarako eta Elkartasunerako Euskal Agentziaren laguntzarekin eta Zehar-Errefuxiatuekin elkartearen koordinazio teknikoarekin. Euskal Herriko Kolonbiarren Elkarteak, Más Mujeres erakundeak eta Sudergintza Kooperatibak osatuko dute aurten laguntza sarea.