Eusko Jaurlaritzako gobernu kontseiluak bileran onartu du 2024-2025 ikasturtean doktoratu aurreko programan laguntza berriak deitzen eta lehendik zeudenak berritzen dituen agindua, doktore ez den pertsonal ikertzailearen prestakuntzara zuzenduta. Deialdiak 11.899.267 euroko zenbatekoa du, ikertzaileen prestakuntza sustatu nahi du doktore titulua eta kalitatezko ikerketa zientifikoari lotutako gaitasun eta trebetasunak eskura ditzaten doktoretza programa baten barruan.
Jaurlaritzatik jakinarazi dutenez, deialdiak barne hartzen du laguntza berriak ematea eta aurreragoko deialdietan emandakoak berritzea ere. Zehazki, kopuru osotik 2.657.960 euro laguntza berriak emateko bideratuko dira, eta gainerako 8.591.447 euroak lehendik indarrean zeudenak berritzeko. Gainera, deialdi berriak joan den urtean martxan jarri zen Doktorego Ondoko Orientazioa lerroari eusten dio (649.860 euro).
Horrela, 2024-2025 ikasturtean 416 euskal ikertzailek doktorego aurreko kontratua izango dute: 306 kontratu berrituko dira eta doktore aurreko 110 laguntza berri emango dira. Aurreko ikasturtean 394 euskal ikertzailek jaso dituzte doktoratu aurreko kontratuak: 109 laguntza berri gisa izan ziren, eta gainerako 285 kasuetan berritzeak izan ziren.
Laguntzen onuradun izango dira unibertsitate lizentziatura edo gradu bat izanik tesi proiektua egingo duten pertsona fisikoak, betiere egoitza Euskal Autonomia Erkidegoan (EAE) dutenak. Laguntzak doktoratu aurreko kontratu baten ezaugarriak izango dituzte, urtebeteko iraupenarekin.
Kontratua bere ikerketa garatuko duen aplikazio zentroarekin izenpetuko du ikertzaileak, eta bere xedea izango da proiektu zehatz eta berrietan ikerketa lanak egitea, lanaldi osoko erregimenean. Kontratua beste hiru alditan ere luzatu ahal izango da (gehienez elkarren segidako 48 hilabetez), laguntza berrituz gero.
