“Frantzia inteligentzia politikoa erakusten ari da”

-Nahi nuke egun ederra eta emankorra izatea beste urratsak egin ahal izateko. Bake prozesuek arazoak sortzen dizkiete batzuei baina urratsak eman behar ditugu. Gure prozesua ez da bakarrik gure artekoa, gakoa eta motorra gizartea baita.

Bi liburu eta diskoa plazaratu dira ‘Bakegileen’ inguruan...

-Luhuso baino lehenago ere mugimenduak zeuden eragileen aldetik ekarpena egin eta sostengua erakusteko. Plazer egiten du haiek ere eragile direlako eta horrela bizitzen dutelako. Mugimendua jendearen barnera sartu dela adierazten dute kultura aldetik dauden ekarpenek. Abentura berean gaude.

Espero al zenuten Pariseko udalbatzaren babesa?

-Baikorra da. Euskal Herriko gaiak gurean mugatzen dira ia beti. Baina eskuetan dugun erronka gai unibertsala da. Justizia ministeritzarekin hasitako bilerek zilegitasuna ematen digute. Agian jende gehiago ohartuko da gaur Parisen egon behar duela.

Zainketa berezia 7 presori kentzea nahikoa al da?

-Urrun gaude helburutik baina gure eskakizunetako bat zen. Urrats bat izan da dudarik gabe eguneroko bizian gauzak aldatuko zaizkie eta. Errepublikako presidente eta lehen ministroaren jauregietako baimena du Justizia sailak aldaketa horiek egiteko. Armagabetzeak paisaia aldatu du erabat eta hori Parisek ere integratu du. Inteligentzia politikoa erakusten ari da Frantzia.

Gaurko mobilizazioaren leloa da ‘Orai bakea, orain presoak’. Eta biktimak?

-Gure buruan tokia dute biktimek. Armagabetzea urrats handia izan zen haientzat ere, beste biktimarik ez baita izango. Urtarril bukaeran lan sakona hasiko dugu biktimen inguruan eta, uda baino lehen, lehen ekarpen publikoa egingo dugu. Dena ez baitakigu lan horretan, Eusko Jaurlaritzaren laguntza eta elkarlana izatea espero dut. - F. Dolosor