Euskal Herriko Gazte Orkestrak Seohyun Kim biolinista izango du lagun udako birako kontzertuetan

EGOk uztailaren 12an hasi zuen udako bira prestatzeko egonaldi artistikoa, eta egun horretan bertan ekin zien bost kontzertuetarako entseguei. Ruben Gimeno zuzendari artistikoaren gidaritzapean, Hondarribian (uztailak 18), Azkoitian (uztailak 19), Donostian (uztailak 20), Bilbon (uztailak 21) eta Gasteizen (uztailak 22) arituko da EGO.

Gazte orkestraren udako topaketaren aurkezpen ofiziala asteazken honetan egin da, Euskadiko Orkestraren egoitzan, Donostian, eta bertan izan dira Ibone Bengoetxea Eusko Jaurlaritzako lehen lehendakariorde eta Kultura eta Hizkuntza Politikako sailburua, German Ormazabal EGOren koordinatzaile nagusia, Iban Garate aktore eta aurkezlea, Seohyum Kim biolinista eta Ruben Gimeno EGOren zuzendari artistikoa.

Bengoetxeak nabarmendu du Euskadin "izugarrizko sormen talentua" dagoela, eta EGOk "talentu gazte hori zaintzeko, hezteko eta gozatzeko tresnak" eskaintzen dituela, "bere lanbide bihurtzeko".

Seohyun Kim korear biolinista gaztearen parte hartzea izango da EGOren udako kontzertuen berezitasun erakargarrienetakoa. Tibor Varga Nazioarteko Biolin Lehiaketaren azken edizioa irabazi zuen eta Tibor Vargaren seme eta hamar urtez Euskadiko Orkestraren zuzendari izandako Gilbert Vargak utzitako instrumentua darabil.

15 urterekin, Seohyun Kimek Txaikovskiren 'Biolinerako kontzertua' lan exijenteari egingo dio aurre. Bere generoko kontzertu txalotuenetakoa da eta, EGOren arduradunen iritziz, "instrumentu honetarako historian idatzi den onenetakoa ere". EGOk lehen aldiz interpretatuko du obra.

"Soilik birtuosoenen mailan" dagoen partitura errepertorio erromantikoaren gailurrean dago. Seohyunen hitzetan, "pieza hau benetan berezia da niretzat, duen sakontasun emozional eta teknika bikainagatik. Gogo handia dut euskal entzuleekin partekatzeko. Esperientzia ahaztezina izango delakoan nago".