egia da inoiz ez dudala ur eza pairatu. Hala ere, oso gogoan dut herrialde askok oraindik ez dutela edateko urik. Horretaz kontziente izanik, nire alabei gogorarazten diet pertsona guztiek ez dutela guk adina zorte, ura nahi dugun bakoitzean txorrota ireki besterik ez dugula egin behar. Horregatik, gure etxea eraberritu genuenean, bainuontziaren ordez dutxa jartzea aukeratu genuen, eta ohitura batzuk hartu ditugu. Ohitura horiek ez dute ahalegin handirik eskatzen, eta garrantzi handia izan dezakete denok hartuko bagenitu, adibidez, hortzak garbitzen ditugun bitartean txorrotak ixten ditugu, ontzi-garbigailua edo garbigailua beteta daudenean jartzen ditugu eta dutxa laburrak hartzen ditugu. Gaur Uraren Mundu Eguna ospatzen da Acelerar el cambio lelopean, ura erabiltzeko modua aldatzeko gizarteari dei eginez. Premiazko aldaketa da ura planetako bazter guztietara iristea lortzeko, baita pobreenetara ere. Eta orduan, Harkoren istorioa ezagutu nuen. Hamahiru urteko neskato horrek eskolara joateari utzi zion, neba txikiarekin ordu luzez ibili eta familiari ura eramateko. Horrek erakusten du ur faltaren ondorioak agerikotik haratago doazela. Izan ere, uraren etorkizuna gure planetaren etorkizuna ere bada, nahiz eta batzuetan ez dela gure kontua dirudien.
