Gasteizko Ingurumen Gaietarako Ikastegiak Ingurumenaren Eguna ospatuko du igandean Atarian egingo duen jai handiarekin

Gasteizko Ingurumen Gaietarako Ikastegiak jai handia antolatu du iganderako, ekainaren 7rako, ostiralean ospatuko den Ingurumenaren Nazioarteko Eguna dela eta, Ataria Salburuko Hezeguneen Interpretazio Zentroan.

Gasteizko Udaleko Ingurumeneko zinegotzi Borja Rodriguezek azaldu duenez, "ingurune naturala babestea eta zaintzea funtsezkoak dira giza ongizaterako eta aurrerapen ekonomiko globalerako. Ekintza klimatikoa karbono emisioak murrizteaz harago doa: gure ekonomiei eusten dieten sistemak eraldatzea eta klimarekin dugun harremana berreraikitzea eskatzen du".

"Ingurumen Jaiaren bidez, ingurumeneko arazoak konpondu eta toki eta mundu mailan ingurumeneko eta gizarte eta ekonomia arloko jasangarritasunerantz aurrera egin beharra dagoela gogorarazi nahi dugu", gaineratu du.

Jarduera programa 11:00etan hasiko da, eta 14:00ak arte iraungo du. Salburuko hezeguneetara hurbiltzen direnek egurrez egindako jolas tradizionalez, energia berriztagarriekin funtzionatzen duten gailu eta jokoen erakusketaz, eguzki energiarekin funtzionatzen duen sukaldaritzako erakustaldiaz eta ondoren prestatutako produktu horien dastaketaz eta 'Salburua eta bertako hegaztiak' ibilbide naturalistikoaz gozatu ahal izango dute.

Hala, eta ildo horretatik jarraituz, bertatik prentsa ohar baten bitartez azpimarratu duten bezala, 'Naturaren magia' ipuin kontaketa saioak eta 'Utzi zure irudia klima aldaketari buruz' jarduerak osatuko dute igandeko programa. Jarduera guztietarako sarrera librea izango da tokia bete arte.