Gasteizko Udalak sexu transmisiozko infekzioei buruzko 'Hau bai birala!' izeneko sentsibilizazio eta prebentzio kanpaina jarri du martxan Osasun Publikoaren Zerbitzuaren bidez, eta Sidalava Arabako Hiesaren aurkako Herritarren Batzordearekin lankidetzan, 16 eta 29 urte bitarteko gazteen artean sexualitate osasungarria, segurua eta arduratsua sustatzeko asmoz.
Kanpaina berriaren xehetasunak eman dituzte Ana Lopez de Uralde Osasun Publikoaren zinegotziak eta Blanca Bastida Sidalava Arabako Hiesaren Aurkako Batzordeko presidenteak.
Iragarri dutenez, kanpainak gazteen elkarrekintza ohituretara egokitutako formatu eta kanal ugari uztartuko ditu. Horrela, ekintza nabarmenen artean daude 5.000 kondoiren banaketa, material grafikoak zabaltzea udal espazioetan, unibertsitateko eremuan eta ostalaritza lokaletan, sare sozialetarako bideo bat 'Escuchamos pero no juzgamos' joko biralean inspiratua, eta udal webgunean informazio argia eta eskuragarria ohikoenak diren infekzioei, horien prebentzio metodoei eta detekzio goiztiarraren garrantziari buruz.
Informazioa emateaz gain, ekimenak sexu praktika seguruak izatearen beharraz kontzientziatzea, preserbatiboaren erabilera sustatzea eta proba diagnostikoak egitea bultzatu nahi du. Prebentzio materialaren banaketa eta kanpainaren ondorengo ebaluazioa ere aurreikusi dira, hartzaileen artean duen eragina neurtzeko.
Kanpaina Gasteizko Udalaren III. Osasun Planaren barruan sartuta dago, bizimodu eta ingurune osasungarriei buruzko ildo estrategikoaren baitan, eta sexu transmisiozko infekzioek batez ere gazteen artean izandako gorakada jarraituari erantzuna ematea du helburu, azken datuen arabera, diagnostikoek etengabe gora egin baitute azken hamarkadan.
"Araban, urte bakar batean, sexu transmisioko 641 kasu berri eta 19 GIB kasu diagnostikatu dira; azken horiek Euskadin erregistratutako guztizkoaren %15 dira. Zifra horiek agerian uzten dute sexu transmisioko infekzioak oso presente daudela gure lurraldean, eta, horien artean, gonorrea eta klamidia direla gehien detektatzen direnak. Zehazki, 600 kasu berrietatik, 309 klamidia izan ziren, 257 gonorrea eta 75 sifilia", zehaztu du Ana Lopez de Uraldek.
