Haur eta nerabeentzako Kulturarteko Topaketa egingo da igandean Gasteizen

Haur eta nerabeei zuzendutako Kulturarteko Topaketa egingo da igandean, urriaren 19an, Gasteizko Santa Barbara plazan. Gasteiz Hobetuz Txiki programan egindako proposamen baten emaitza da ekimena, eta inklusioa, bizikidetza, aitortza eta aniztasunarekiko errespetua bezalako balioak sustatzea du helburu.

"Haurrei eta nerabeei zuzendutako kulturarteko topaketa prestatu dugu, eta hiriaren aberastasun kulturala ezagutu, baloratu eta goraipatzeko eta bizikidetzarako oinarrizko balioak sustatzeko aukera emango duten ikaskuntza espazioak egongo dira bertan", zehaztu du Miren Fernandez de Landa Gasteizko Udaleko Gobernu Irekiaren eta Gizarte Etxeen zinegotziak.

ORDUTEGIA

Ekimena 10:30etik 14:30era egingo da, eta Kalimba musika elkarteak eta Olabide ikastolako 6 B eta 6 D gelek 2023-2024ko ikasturtean Haurren eta Nerabeen Elkargunean haurren partaidetzarekin egindako hiru forok aurkeztutako proposamenak batzen ditu.

Hobetuz Txiki ekimenaren bidez jarri da martxan orain, hiriko hainbat erakunde eta elkarteren laguntzarekin. "Elkargunean parte hartzen duten haur eta nerabeek oso modu aktiboan egiten dute, eta sustatu nahi dituzten balioak funtsezkoak dira gizarte bidezkoagoa eta ekitatiboagoa eraikitzeko", adierazi du Lucho Royero Gizarte Politiketako zinegotziak.

Egitarauan, DJ MaKedaren emanaldia, ipuin kontaketak, txirikorda tailerrak, korapiloenak, kaligrafia txinatarra edota munduko instrumentuak daude. Jolas tradizionalak, 'chill out' bat, capoeirako erakustaldia, jantzi tradizionalen desfilea eta batukada ere izango dira.