Gasteizko Udala Dato kaleko zuhaitzak inausten hasi da, kaleari argitasun eta ikuspen handiagoa emateko

Gasteizko Udala Dato kaleko zuhaitzak inausten hasi da astelehen honetan Manuel Iradier eta Florida kaleen artean. Erdiguneko bide enblematikoenetako baten argitasuna hobetzea eta bere hirigintzako eta arkitekturako balioa goratzea dira lanen helburuak.

Izan ere, Gasteizko Udaletik jakinarazi dutenez, tamaina handiko magnoliek argi naturala gutxitu eta, askotan, farolak estaltzen dituzte eta, ondorioz, egunez zein gauez, argitasuna gutxitzen da.

Hala, eta ildo horretatik jarraituz, Gasteizko Udaletik azpimarratu dutenez esku hartzearen bidez, Gasteizko Udaleko Espazio Publikoaren eta Auzoen Sailak bizilagunek egindako eskaerei erantzungo die, kale argitsuagoa eta seguruagoa eskatzen baitzuten.

BALORAZIOA

"Dato kalea da gure aurkezpen gutunetako bat: merezi duen moduan distira egitea eta argitsuagoa, atseginagoa eta ederragoa izatea nahi dugu. Inausketa honekin, argitasun eta segurtasun handiagoa lortzeaz gain, Gasteizko hiri ondarea osatzen duten fatxaden ikuspena berreskuratuko dugu", azaldu du Beatriz Artolazabal Espazio Publikoaren eta Auzoen zinegotziak.

Jarduketa Dato kaleko argiztapenaren hobekuntza integralaren barruan kokatzen da. Lan horiek abuztuan hasi ziren espazio publikoaren kalitatea indartzeko luminarien aldaketarekin.

"Lehenbizi argiztapena berritu dugu, eta orain beste urrats bat emango dugu argi hori txoko guztietara irits dadin. Inausketa honekin Dato kalea argitsuagoa, seguruagoa eta atseginagoa izatea lortuko dugu egunero bertatik pasatzen direnentzat", gaineratu du Artolazabalek.