Jaurlaritzak 2030era arteko Landa Garapeneko Estrategia onartu du landa inguruneko ekintza publikoa antolatzeko

Eusko Jaurlaritzako gobernu kontseiluak 2030era arteko Landa Garapeneko Estrategia eta Lurralde Garapenerako Programa onartu du astearte honetan egindako bileran, Elikadura, Landa Garapen, Nekazaritza eta Arrantza Sailak Sailak aurkeztuta. Estrategiaren helburua da landa inguruneko ekintza publikoa antolatzea, eta zeharkako programa da, lurralde antolamendua, trantsizio ekologikoa, etxebizitza, mugikortasuna, osasuna, berrikuntza eta gizarte kohesioa lotuko baititu.

Amaia Barredo Elikadura, Landa Garapen, Nekazaritza eta Arrantza sailburuak azaldu duenez, ekimenak landa eremuetan bizi diren herritarren bizi kalitatea hobetzea du helburu, hiru ardatz nagusiren bidez: eskubide berdintasuna eta oinarrizko zerbitzuak bermatzea, dibertsifikazio ekonomikoa eta berrikuntza sustatzea, eta natur eta kultur ingurunea zaintzea eta balioestea.

Horretarako, esku hartzeko arloak hiru eremu nagusitan banatu dira: dinamizazioa, gobernantza eta plangintza; azken hori da, hain zuzen ere, astearte honetan onartu den Lurralde Garapenerako Programak jasotzen duena. Programa estrategiaren oinarrietako bat da plangintzari dagokionez, eta Landa Garapeneko Eskualdeko programen esparrua izango da.

"Lurralde Garapenerako Programaren bidez politikak eta programak koordinatu eta lerrokatuko dira, landa bermearen mekanismoa aplikatuko da, laguntza eta finantzaketa programak zehaztuko dira eta lurralde eta sektore ekimenen arteko osagarritasuna bultzatuko da. Hori guztia ezarritako helburuak lortzeko, hala nola landa ingurunea eta nekazaritza espazioa zaintzea, dibertsifikazio ekonomikoa eta enplegua sustatzea, eta landa eremuko herritarren ongizatea hobetzea", esan du Barredok.

BEROSI PROIEKTUA

Bestalde, landa eremuetan bankuen bulegoak kentzeak finantza bazterketa eragin du bizilagun askorentzat, kutxazain batera iristeko kilometroak egin behar baitituzte, eta, egoera horri aurre egiteko, Berosi proiektua jarri da martxan. Ekimen zehatza da, finantza inklusioa bermatu nahi duena, gaur egun Euskadiko eremu batzuetan existitzen ere ez dena.

Horrela, 38 udalerritan kutxazainak instalatzeko lizitazioa abiatuko da bazterketa finantzarioari irtenbidea emateko. Honako faktore hauek kontuan hartuta aukeratuko dira udalerriak: 300 biztanletik gorakoak izatea eta kutxazainik eta banku bulegorik ez izatea, kutxazainik hurbilena gutxienez zortzi kilometrora izatea, eta urtean 100.000 turista baino gehiago izatea.

38 kutxazain horiek instalatuta -31 instalatuko dira 24 hilabeteko epean-, 22.500 pertsona baino gehiagorengana iritsiko da, hau da, EAEko udalerrien ia %93ra eta landa inguruneko biztanleen %96ra. Aurrekontua 1,15 milioi eurokoa izango da 2029ra arte, eta Eusko Jaurlaritzak finantzatuko du osorik.