Gasteizko Udalak 14.000 euroko laguntza eman dio Zas Kultur elkarteari

Gasteizko Udaleko Kultura Sailak 14.000 euroko diru laguntza eman dio Zas Kultur elkarteari, aurreko urtean baino 5.219 euro gehiago. Era berean, laguntza emateko modua aldatu da, lehen aldiz lankidetza hitzarmena sinatu baita elkartearekin.

Sonia Diaz de Corcuera Kultura zinegotziak azaldu duenez, "Kultura Sailaren eginkizun bakarra ez da jarduera programatzea, Gasteizko bizitza kulturala dinamizatzen duten beste erakunde batzuen sustatzaile ere badelako".

"Kultur programak bultzatzen zortzi urte daramatzan eta 500 bat kultur eragileren parte hartzea izan duten 350 ekimen eta proiektu baino gehiago martxan jarri dituen Zas Kulturren kasua da", esan du.

Gaur egun, Zar Kultur elkarteak programazio egonkorra eta errotua du gaur egun, eta aniztasuna eta proiektu esperimentalei, generoari eta kultura garaikideari arreta berezia eskaintzea dira bere ezaugarriak.

Bestalde, Tokiko Gobernu Batzarrak hiru dirulaguntza hitzarmen sinatzea onartu du gaur goizean tokiko enpresa txikien, ikus-entzunezkoen industrien eta enpresari gazteen jarduerari laguntzeko. Ekonomia Sustapen, Enplegu, Merkataritza eta Turismo Sailak 62.000 euro bideratuko ditu, nazioartekotze, garapen eta aholkularitza ekintzak bultzatzeko, besteak beste.

Onartutako lehen hitzarmena Arabako Merkataritza, Industria eta Zerbitzuetako Ganberarekin da, tokiko enpresa txikiei laguntzeko 32.000,00 euroko programa bat gauzatzeko. ETEen nazioartekotzea erraztea du helburu, nazioarteko sustapen-ekintzetarako sarbidea erraztuz. Itun berdeari atxikitako tokiko enpresei laguntza ekonomiko eta tekniko espezializatuaren bidez lagunduko die. Enpresa horiek nazioko eta nazioarteko azoketara joateko, nertworking topaketetan parte hartzeko eta xede komertzialetako parte izateko aukera izango dute.

Bigarren hitzarmena Ikus-entzunezko Ekoizleen Elkartearekin (APIKA) sinatuko da, “Apika Audiovisual Project LAB 2025” programa gauzatzeko, 20.000,00 euroko diru-laguntzarekin. Ikus-entzunezko proiektuen ekoizpena bultzatzea du helburu. Horretarako, gidoien behin betiko bertsioa idazteko eta ekoizpen estrategia garatzeko laguntza eskaintzen du.