Gasteizko 'Kirol bidean' eta 'Jarduera nautikoak' udako udal programek 883 toki izango dituzte

Ekainetik irailera bitarte egingo dira, 883 plaza eskainiko dituzte, eta izena emateko epea datorren astelehenean irekiko da, maiatzaren 13an, aurrez aurre zein udal webgunean.

"Udal Kirol Zerbitzuak aukera eman nahi die herritarrei aire zabaleko hainbat kirol modalitate ezagutzeko eta praktikatzeko"

Ana Lopez de Uralde Kirol zinegotziak azaldu duenez, "programatutako jardueren bidez, Udal Kirol Zerbitzuak aukera eman nahi die herritarrei aire zabaleko hainbat kirol modalitate ezagutzeko eta praktikatzeko. Gainera, uda garaia denez, beste kirol batzuk egiteko aukera izango dugu, esaterako, surfa, kayaka edo paddle surfa. Halaber, gazteek, udan denbora libre gehiago izaten dutenez, ariketa fisikoa egiteko eta haien harreman sozialak handitzeko aukera izango dute".

Ekainetik irailera bitarte egingo dira, 883 plaza eskainiko dituzte.

Horrela, 'Kirol bidean' programak 470 leku eskainiko dizkie 12 eta 30 urte bitarteko gazteei

Horrela, Kirol bidean programak 470 leku eskainiko dizkie 12 eta 30 urte bitarteko gazteei, ekainetik irailera bitartean 12 kirol jardueraz gozatzeko. Neguko denboraldian izandako arrakastaren ondoren, udako denboraldian skatea sartu dute berritasun gisa, eta espeleologia, kalistenia, zaldiz egindako txango, ferrata bide, kayak zeharkaldi, surf, itsas kayak, haitz eskalada, arroila jaitsiera, bizikleta eta paddle surfari gehituko zaie.

Jarduera guztiak ekainetik irailera bitarteko larunbat eta igandeetan egingo dira Araban

Jarduera guztiak ekainetik irailera bitarteko larunbat eta igandeetan egingo dira Araban, itsasoarekin lotutakoak izan ezik, Bizkaiko Laga eta Laida hondartzetan egingo baitira. Izen-ematea datorren astelehenean irekiko da eta udal webgunean, gizarte etxeetan, udal kiroldegietan eta Udaleko Gazteen Informazio Bulegoan egin daiteke. Udalaren kirol instalazioetako abonatuek 11,62 eta 27,30 euro artean ordaindu beharko dute, eta gainerakoek 19,36 eta 45,45 euro artean (bi kasuetan, jarduera motaren arabera).

Kirol Zerbitzuak 54 ikastaro antolatu ditu ekaina eta abuztua bitartean hainbat modalitate nautiko praktikatzen hasteko

Bestalde, Kirol Zerbitzuak 54 ikastaro antolatu ditu ekaina eta abuztua bitartean hainbat modalitate nautiko praktikatzen hasteko. Igeri egiten dakiten 11 urtetik gorakoei zuzenduta daude eta 413 plaza eskainiko dira piraguismoa, TDV-Windsufa, stand up paddle surfa, haurrentzako bela (7-15 urte) eta belaren hastapena (16 urtetik gorakoentzat) jardueretarako. Ekintza guztiak Gasteizko Klub Nautikoan egingo dira (Uribarri Ganboako urtegian).

Izen-emateak astelehenetik ikastaroa hasi aurreko ostegunera bitarte egin ahal izango dira

Izen-emateak astelehenetik ikastaroa hasi aurreko ostegunera bitarte egin ahal izango dira, udal webgunearen bidez, gizarte etxeetan, udal kiroldegietan eta 010 telefonoan. Udal kirol instalazioetako abonatuek 40,40 eta 75,75 euro artean ordaindu beharko dute, eta gainerakoek 66,70 eta 126,25 euro artean.