EuroBasque Europako Mugimenduaren Euskal Kontseiluak 'Artea eta kultura Europako Batasunaren sorreran' jardunaldia egingo du Gasteizen asteazken honetan, maiatzaren 8an, Jesus Guridi Musika Kontserbatorioarekin lankidetzan, Europaren Eguna ospatzeko.
Antolatzaileek jakinarazi dutenez, ekitaldia 19:30ean hasiko da, kontserbatorioaren areto nagusian, eta Pilar Jurado soprano, konpositore eta zuzendariak hitzaldia emango du, Europar nortasunaren sorreran kulturak eta musikak izan duten garrantziaren eta artea eta artistak babesteko eta zaintzeko Europar Batasunak egun dituen zenbait alderdiren inguruan.
Jarraian, Ane Ruiz de Pinedo (F. Mendelssonhen 'Salve Regina') eta Txomin Maidagan (L.W. Beethovenen 'Der Kuss') abeslarien eta Alba Claver pianistaren (F. Liszten 'Campanas de Ginebra') emanaldiak izango dira.
Obulutegiko Minbiziaren Nazioarteko Eguna
Bestalde, Gasteizko Udalak bat egingo du Obulutegiko Minbiziaren Nazioarteko Egunarekin asteazken honetan, maiatzaren 8an, eta urdinez argiztatuko ditu hiriko zenbait eraikin enblematiko, hala nola udaletxeko fatxada, Arkupeen pasealekua, Floridako kioskoa eta Santa Barbara eta Antso Jakituneko pergolak.
Emakumeen artean seigarren minbizi ohikoena da obulutegikoa
Gasteizko Udaleko iturriek jakitera eman dutenez, emakumeen artean seigarren minbizi ohikoena da obulutegikoa. Mundu osoan 205.000 kasu berri inguru izaten dira urtean, eta kasuen %80 fase aurreratuetan atzematen dira.
Obulutegiko Minbizia duten Pertsonen Elkartearen arabera, gaur egun "ez dago" diagnostiko goiztiarra errazten duen metodo eraginkorrik, eta, beraz, uste du "beharrezkoak" direla minbizi horri buruzko kontzientziazio kanpaina gehiago, emakumeak eta profesionalak tumore horren sintomen inguruan sentsibilizatzeko.
