"Gasteizko gizarte-etxeek etengabe berritzen ari diren jarduerak eskaintzen dituzte". Oraingoan Zabalganakoak auzoko bizilagunak deitu ditu gaur The Beatles taldearen musikaz gozatzeko. Jardueraren helburua edozein adinetako pertsonen arteko topaketa sustatzea da, elkarrekin arrakasta musikal handiez gozatzeko.
‘Diskaldia: The Beatles’ izenarekin, gizarte-etxeak musika-entzunaldi hau antolatu du, inguruan bizi diren eta musika gustuko duten pertsonen arteko topaketa bultzatzeko eta, horrela, harreman-modu berriak sortzeko. Jarduera 19:00etatik 21:00etara izango da eta ez da izena eman beharrik. Hitzordua 1. erabilera anitzeko aretoan izango da, gehienez 50 lagunentzako lekuarekin. “Proba pilotu bat da Zabalganakoa. Behar balitz, hiriko beste eremu batzuetara zabal genezake“, azaldu du Miren Fernández de Landa Gobernu Irekiaren eta Gizarte Etxeen zinegotziak.
‘Diskaldia’ ZabalMusika programazioaren barruan dago, eta orain arte musika sustatzeko hainbat ekitaldi antolatu ditu auzoan: Fran Serranoren jazz kontzertua, Big Band Berriko beste kontzertu bat eta abesbatzen emanaldi bat, besteak beste.
Oraingoz, ‘Diskaldiak’ hilean hiru hitzordu ditu aurreikusita. Biharkoa, gaztelaniaz izango dena, Alfonso Aramburu musika adituak egingo du, modu altruistan. Bera arduratuko da musika jartzeaz eta libreto bat partekatuko du jarduera parte-hartzailea izan dadin. “Alfonsok diskoak jarriko ditu, biniloak egongo dira eta horiek ukitu eta ikusi ahal izango dira, eta letretan sakontzeko, musikaren historia hobeto ezagutzeko… aukera emango du. Asmoa arratsalde bat konpainia onean eta musika onarekin partekatzea da”, laburbildu du zinegotziak. Ez da klase magistrala, soinuaren esperientzia sentitzeko, gozatzeko eta komentatzeko gonbidapena baizik.
Hurrengo hitzordua otsailaren 13an izango da, San Valentin bezperan, “Love songs” gaiarekin, hau ere Arambururen eskutik. Martxoko topaketa zehazteke dago.
