Euskal Autonomia Erkidegoko (EAE) Barne Produktu Gordina (BPG) %2,1 igo da 2024an aurreko urtearekiko, eta enpleguak, lanaldi osoko lanpostu baliokide gisa neurtuta, %1,8ko hazkundea izan du, hau da, 17.000 lanpostu baino gehiago sortu dira, Eustat euskal estatistika erakundeak egindako hiruhilekoko kontu ekonomikoen aurrerapenaren zenbatespenen arabera.
Eustatek zehaztu duenez, aurrerapena egiteko unean eskuragarri zegoen koiunturazko informazioaren azterketatik ondorioztatzen da balio erantsia 2023an baino intentsitate txikiagoarekin hazi dela 2024an sektore ekonomiko guztietan, merkataritza, ostalaritza eta garraioaren eta administrazio publiko, hezkuntza, osasun eta gizarte zerbitzuen sektoreetan izan ezik, hazkundea areagotu egin baitute.
2024ko laugarren hiruhilekoari dagokionez, aurreko hiruhilekoaren aldean BPG %0,4 igo ondoren, aurreko urteko hiruhileko beraren aldean %1,9 igo da
Bestalde, 2024ko laugarren hiruhilekoari dagokionez, aurreko hiruhilekoaren aldean BPG %0,4 igo ondoren, aurreko urteko hiruhileko beraren aldean %1,9 igo da. Enplegua, lanaldi osoko baliokidetzako lanpostu gisa neurtuta, %0,4 hazi da 2024ko azken hiruhilekoan, aurreko hiruhilekoarekin alderatuta, eta %1,6ko hazkundea zenbatetsi da 2023ko hiruhileko beraren aldean.
Eustatek martxoaren 7an argitaratuko du BPGaren eta enpleguaren zenbatespen banakatuak 2024ko laugarren hiruhilekoko hiruhilekoko kontu ekonomikoetan, aurrerapena egiteko unean eskuragarri ez zegoen koiunturazko informazio ekonomikoa gehitu ondoren.
