Xabier Sagredok (BBK) jasoko du 2024ko Ekonomistak Saria

Xabier Sagredo Ormaza BBK Fundazioko presidente exekutiboak jasoko du 2024. urteko Ekonomistak Saria, gizarte ongizateari eta Kutxabanken lurralde sustraitzeari egindako ekarpena aitortzeko, Garapen Jasangarriko Helburuekin bat datorren lehiakortasun eredu iraunkorra bultzatuz.

"Bere gidaritzapean, BBK-k ingurunearekiko konpromisoa sendotu du, finantza berrikuntza ikuspegi arduratsu eta jasangarriarekin uztartuz eta komunitatean eragin positiboa sortuz", nabarmendu dute saria ematen duen Ekonomisten Euskal Elkargotik.

Ekonomisten Euskal Elkargoak arloko ia 4.000 euskal profesional ordezkatzen ditu, eta Ekonomistak Saria Juan Echegoien Echevarria artistak xede horrekin sortutako eskultura bat da. Sagredok urriaren 15ean jasoko du saria, Bizkaia Aretoan 19:00etan hasiko den ekitaldian, Bilbon.

Xabier Sagredo Ekonomia eta Enpresa Zientzietan lizentziaduna da, finantza arloan espezializatua, eta hainbat arlotan graduondokoa eta arrisku teknologikoei buruzko prestakuntza du. 25 urte baino gehiagoko esperientzia exekutiboa du finantzen, energiaren eta iraunkortasunaren arloetan. Gainera, esperientzia sendoa du hasieratik proiektuak sortzen eta hedatzen, epe luzerako balioa sortzeko ikuspegiarekin.

Gaur egun BBK Fundazioko presidente exekutiboa da. Bere lehendakaritzapean, erakundearen eraldaketa integralaren buru izan da, lehiakortasun jasangarriaren ereduan oinarrituz. "Bidezko lehiakortasuna, berrikuntzaren, teknologiaren eta talentuaren aldeko apustua egiten duena, gizarte, ingurumen eta gobernantza irizpideak errespetatuz", adierazi dute.

BBK gaur egun enpresa inbertsiorako ahalmen handiena duen Espainiako erakundea da. Inbertsio horien barruan, nabarmentzekoa da Estatuko banku garrantzitsuenetakoa den Kutxabanken kontrol akziodun izatea. Gainera, enpresa-inbertsioetan aktibo gehien dituen konpainietako bat da, 4.000 milioi euro inguru inbertituta, eta Euskal Autonomia Erkidegoko (EAE) inbertsioetan lider da. Partaidetza horiengatik jasotako dibidenduen bidez, BBKren gizarte ekintzaren iraunkortasuna bermatzen da.