Euskal AEko industria-produkzioa 2023ko maiatzean aurreko urteko hil berekoa baino % 2,4 txikiagoa izan da, lan-egutegiko baldintza homogeneoetan, Eustatek prestatutako datuen arabera. 2023ko lehen bost hiletan metatutako produkzioa, berriz, aurreko urteko aldi berekoa baino % 0,6 handiagoa izan da.
2023ko apirilean, aurreko hilarekin alderatuta, Euskal AEko industria-jarduerak % 0,4 egin du behera azken hilabete honetan, urtaro-ondorio egokiak zuzenduta.
Ondasunen helmuga ekonomikoaren arabera, Energiak % 10,9 egin du behera, urte arteko tartean, 2023ko maiatzean. Sektore horretan, energia elektrikoaren produkzioa eta hornikuntza eta petrolio-fintzea sartzen dira.
Era berean, Tarteko ondasunetako jarduerek, besteak beste, metalurgiak eta produktu metalikoen fabrikazioak, industria kimikoak eta kautxuzko eta plastikozko produktuen fabrikazioak, urte arteko % 2,4ko jaitsiera izan dute produkzioan.
Ekipo-ondasunen produkzioak % 0,5eko jaitsiera izan du, bestalde. Haien artean honako hauek daude: motordun ibilgailuen fabrikazioa; lokomotorren eta trenbide-materialaren eraikuntza, eta eraikuntza aeronautikoa edo ontzigintza.
Kontsumo-ondasunek, berriz, urte arteko portaera positiboa izan dute 2023ko maiatzean; produkzioak % 0,6ko hazkuntza izan du sektorean. Hazkuntza hori Kontsumo ez-iraunkorreko ondasunen portaeraren ondorio izan da, % 6,7 egin baitute gora produkzioan; haietan sartzen dira elikagaien prozesatua eta kontserbazioa; garbitasunerako eta higienerako produktuen fabrikazioa; farmaziako produktuak, eta arropen jantzigintza. Kontsumo iraunkorreko ondasunen produkzioak % 21,6 egin du behera. Haietan sartzen da, besteak beste, altzari eta etxeko tresnen fabrikazioa.
