Euskal Autonomia Erkidegoko industria-prezioek % 1,1 egin dute behera 2023ko maiatzean, aurreko hilaren aldean, Eustatek dituen datuen arabera. Maiatzeko urte arteko tasak azken hamabi hiletako industria-prezioen aldakuntza jasotzen du, eta % 5,7 egin du behera.
Analisi zehatzago batek erakusten du 2023ko maiatzean prezioetan aurreko hilaren aldean jaitsiera nabarmenenak izan dituzten sektoreak honako hauek izan direla: Kokeriak eta petrolioaren fintzea, % 7,1eko jaitsierarekin prezioetan, eta Energia elektrikoa, gasa eta lurruna, % 3,7ko jaitsierarekin. Prezioetan hilen arteko igoera nabarmenenak izan dituzten sektoreak, berriz, Materialaren eta ekipo elektrikoaren fabrikazioa (% 5,1), Ehungintza, larrugintza eta oinetakoak (% 2,0) eta Produktu farmazeutikoen fabrikazioa (% 1,5).
Ondasunen helburu ekonomikoaren araberako sailkapenari jarraikiz, 2023ko apirilaren aldean, Energiak behera egin du prezioetan (% 5,8), eta Kontsumo-ondasunek % 0,5. Azken horien kasuan, jaitsiera Kontsumo ez-iraunkorreko ondasunen prezioen % 2,0ko jaitsieraren ondoriozkoa izan da, Kontsumo iraunkorreko ondasunenak gora egin baitu % 10,5. Bestalde, Bitarteko ondasunen prezioek % 0,4 egin dute gora, eta Ekipo-ondasunenek, % 0,1.
Urte arteko terminoetan, 2023ko maiatzean, 2022ko maiatzaren aldean, prezioen hazkuntza handienak honako adar hauetan izan dira: Kautxua, plastikoa eta beste produktu mineral ez-metalezko batzuk (% 12,8), Zuraren, paperaren eta arte grafikoaren industria (% 12,3), Elikaduraren, edarien eta tabakoaren industria (% 11,6) eta Erauzketa-industriak (% 11,2). Urte arteko terminoetan, jaitsiera handiena izan duten prezioak, berriz, honako adar hauetakoak izan dira: Kokeriak eta petrolioaren fintzea (% 28,3 egin du behera), Energia elektrikoa, gasa eta lurruna (–% 24,5) eta Metalurgia eta produktu metalikoak (–% 3,9).
