Badmintona egiten duten eskola-adineko 60 kirolarik estreinatu zuten joan den asteburuan eskola mailako lehiaketen egutegia. Federazioak beste plangintza bat egin du berriz, eta bertan, 15 urtez azpikoak eta 11 urtez azpikoak hilero lehiatzen dira, banaka eta bikoteka, eta beren maila neurtzeko aukera izaten dute. Lehen jardunaldia Aranalden jokatu zen eta 60 haurrek parte hartu zuten: 31 kirolari 15 urtez azpikoetan eta 29 kirolari 11 urtez azpikoetan. Hainbat klubetako arduradunei galdetu diegu nola egiten dioten aurre lehiaketa honi eta nola moldatu ziren lehenengo egunean.
MIKEL RODRÍGUEZ(LAKUA)
6 urte daramatza Lakua institutuko teknikari gisa, eta 5 urte Gasteiz klubean. 10 eta 17 urte bitarteko haurrek Lakuan jokatzen dute, eta adin horren ondoren Gasteiz klubera pasatzen dira, baina «salbuespenen bat dago beren mailagatik federatu diren eta jada maila nazionalean lehiatzen diren ikasleekin», azaldu du teknikariak. Denboraldi honetan eskola-adineko 34 kirolari ditu bere ardurapean, 12 berriak dira eta gainerakoek institutuko jarduera hasi zenetik daramate. Astelehen, astearte, ostegun eta ostiraletan egiten dituzten entrenamenduetan «badmintonaren hastapena eta badmintonaren funtsezko oinarriak (joan-etorriak, kolpeak, teknika eta taktika), jokalari bakoitzaren mailaren arabera, joko eta ariketa motibatzaile eta dibertigarrien bidez lantzen ditugu, jarduera dibertigarria gerta dakien eta aurrera egiten jarrai dezaten».
Hilero egiten diren lehiaketei dagokienez, 15 egun lehenago irekitzen da izena emateko epea eta Mikelek motibatu egiten ditu parte hartzeko eta entrenamendu bereziak ere egiten dituzte. «Azpimarratu zaie lehiaketetan bakoitzak duena eman behar dela, baina kiroltasunaren, laguntasunaren eta adiskidetasunaren oinarrizko balioak ahaztu gabe», ziurtatu du entrenatzaileak, eta gaineratu du «entrenamenduetatik kanpoko beste ikaskuntza bat da».
DINA ABOUZEID(JUST/BAKARRIK BADMINTON)
Dina Abouzeid pozarren dago lehen jardunaldiko emaitzarekin. Bere klubak jokoan jarri ziren urreetako asko lortu zituen, eta hori atsegin du, nahiz eta «urtebete jarduerarik gabe egon ondoren berriro lehiatu ahal izatea» gehiago baloratzen duen. Bere hitzetan, «esperientzia izugarria izan da 4 urte daramatzaten txiki batzuentzat eta bere lehen lehiaketa izan zen besteentzat ere». Teknikak 62 haur ditu denboraldi honetan eskola-kirolean, eta horien artean 28 animatu ziren lehiaketa honetan parte hartzen.
Bere entrenamenduetan, Dinak, koordinazio eta oinarrizko indar fisikoen bidez, ontzen du teknika. Helburua da «haur horiei kirola, oro har, eta badmintona, bereziki, gustatzea eta, pixkanaka, Arabako lurraldetik kanpo lehiatzen hastea». Bere lana egiteko, ikasleak astean 2 egunetan biltzen ditu, ordubetez egun bakoitzean, eta ordu-kopuru hori: «Oso eskasa da, kirol oso teknikoa delako eta ordu gehiago behar direlako, baina ez dugu instalazio gehiago izateko aukerarik, eta horrek baldintzatu egiten gaitu». Hori dela eta, «loteriarekin amets egiten jarraituko dut, tokatzekotan badminton pabiloi esklusibo bat muntatzearekin, 10 pistarekin».
YERAY CARRETERO(ARONOVA)
Yerayk badminton jokatzen du sei urte zituenetik eta klubean 5 urte daramatza maila nazionalean lehiatzen. Denboraldi honetan Aronovak 22 haur entrenatzen ditu, baina «are gehiago haztea» espero dute. «Nahiko talde heterogeneoa da, 8 eta 14 urte bitartekoa, eta gehienentzat bere lehen urtea da jokatzen», azaldu du. Astean 3 egunetan entrenatzen dute (astelehen eta asteazkenetan 17.45etatik 19.00etara eta ostiraletan 18.00etatik 19.15etara), Lakua BHIn, eta saio horietan entrenatzaileak «badmintonean jokatzen ikas dezaten eta kirol honetaz gozatzea eta kirolari onak izaten ikastea, balio onak lortzen» du helburu.
Eskola-zirkuituko lehiaketei dagokienez, Aronovan ez dute lehiaketa egun bakoitza modu berezian prestatzen, baina garrantzia ematen diote, «beste klubetako haurrekin harremanak izaten dituzten unea delako». Lehenengo jardunaldiak kirolari gazteei «partidak irabaztea uste bezain erraza ez dela konturatzeko» balio izan diela ziurtatu du Yerayk, eta azpimarratu du: «Egiten ditugun lehiaketa guztiak inolako presiorik gabe gozatzeko direla azaltzea garrantzitsua da».
