Arabako Aldundiak 100.000 euro banatuko ditu udalerrien artean nahi gabeko bakardadearen aurkako ekimenak egiteko

Arabako Foru Aldundiak lurraldeko udalei eta kuadrillei nahi gabeko bakardadeari aurre egiteko programak eta jarduerak garatzeko laguntzen lerro bat onetsi du, Gizarte Ongizaterako Foru Erakundearen bitartez, eta 100.000 euro banatuko ditu aurten, gero eta handiagoa den eta adin eta kolektibo guztietako pertsonei eragiten dien arazoari aurre egiteko.

Foru erkaundeak jakinarazi duenez, nahi gabeko bakardadea jada erroturik dagoen gertakari bat da eta eragin zuzena du osasunean, ongizate emozionalean eta gizarte kohesioan. Eragin bereziki esanguratsua du toki inguruneetan, non biztanleriaren zahartzeak, despopulazioak edo baliabide komunitarioen sare mugatuak egoera larriagotu baitezakete.

Udalerri txiki eta ertainetan gertakari hori larriagotu egiten da hainbat faktoreren ondorioz, hala nola despopulazioaren, zahartze demografikoaren eta baliabide komunitario mugatuen ondorioz. Ebidentzia teknikoaren arabera, nahi gabeko bakardadeak osasunerako beste arrisku faktore batzuen pareko ondorioak ditu, eta gaixotasun fisikoak eta osasun mentaleko arazoak areagotzen ditu.

Testuinguru horretan, toki erakundeek, herritarrengandik gertu daudenez, funtsezko zeregina betetzen dute bakardade egoerak detektatzeko eta udalerri bakoitzaren errealitatera egokitutako erantzunak abian jartzeko.

Hori dela eta, Gizarte Politiken Sailak 20.000 biztanletik beherako udalentzako eta kuadrillentzako laguntza deialdia egin du, eta, horrela, jarraipena eman dio Araban nahi gabeko bakardadeari aurre egiteko 'Araba a Punto' lankidetza estrategiari, zeina Arabako Foru Aldundiak gidatu baitu azken urteotan.

Deialdi berriaren helburua da zaintza ekosistemak indartzea komunitatean, herri bakoitzaren gizarte, osasun eta hezkuntza zerbitzuak eta elkartesarea inplikatzen dituzten ekimenak sustatuz. Laguntzen bidez, bakardaketa prebenitzeko, hautemateko eta esku hartzeko proiektuak finantzatu ahal izango dira. Jarduketak kolektibo desberdinei zuzendu ahal izango zaizkie, hala nola adinekoei, gazteei, haurrei, migratzaileei, desgaitasuna duten pertsonei edo zaurgarritasun egoeran daudenei.

Laguntzak norgehiagoka bidez emango dira, eta hainbat alderdi baloratuko dira, hala nola kalitate teknikoa, komunitatean duen eragina, berrikuntza, erakundeen arteko koordinazioa edo genero ikuspegia eta euskararen erabilera txertatzea.

Laguntza lerro berria abian jarrita, udalerriek esku hartzeko gaitasuna indartu ahal izango dute eta komunitatean, prebentzioan eta laguntzan oinarritutako arreta eredu bat finkatu. Deialdia irekita dago eta informazio guztia Arabako Lurralde Historikoaren Aldizkari Ofizialean (ALHAO) kontsulta daiteke.