Gasteizek %100 elektrikoa den tren turistikoa izango du lehen aldiz, bidaiak datorren asteartean hasiko dira, uztailaren 16an, eta 0-12 urte bitarteko haurrentzako sarrera doakoa izango da, Maider Etxebarria Gasteizko alkateak ostiral honetan iragarri duenez.
"Neurri honen bidez, gure hiriaren 'green izaera' sustatuko dugu, 2030erako karbono neutraltasuna lortzeko Garapen Jasangarriaren Helburuak ezarritakoaren arabera. Beste berritasun bat da tren turistikoak bere ibilbidea aldatuko duela hiriko pasealekurik ederrenetako bat erakusteko: Senda ibilbidea", azaldu du.
Trena Andre Maria Zuriaren plazatik abiatu eta Hedegile kalea, Harategi kantoia, Frai Zacarias Martínez kalea, Euskal Herriaren Adiskideen Elkartearen kalea, Eskola kalea, Santa Maria plaza, Pulmonien kantoia, Buruileria plaza, Errementeri kalea, Andre Maria Zuriaren plaza, Mateo Moraza, Olagibel, Foru kalea, Alaba Jenerala, Becerro de Bengoa, Cadena y Eleta, Micaela Portilla, Elvira Zulueta, Frai Francisco Vitoria, Elvira Zulueta, Gaztelako Atea, Luis Heinz, Magdalena eta Prado zeharkatuko ditu, ibilbidea Andre Maria Zuriaren plazan bukatuz.
Zerbitzua datorren asteartean jarriiko da martxan eta urriaren 1era arte egongo da indarrean. 0 eta 12 urte bitarteko haurrentzako bidaiak doakoak izango dira, baina pertsona heldu batek lagunduta joan beharko dute eta heldu hori, gehienez ere, bi txikirekin igo ahal izango da. 12 urtetik gorakoentzako txartelaren prezioa 5 eurokoa izango da.
Tren turistikoa 10:30, 11:30, 12:30, 13:30, 16:30, 17:30, 18:30 eta 19:30ean irtengo da egunero, urriaren 1era arte, eta abuztuaren 4ko arratsaldean atseden hartuko du.
