'Udalekuak 2024' programak 4.203 plaza eskainiko ditu EAEko haur eta gazteentzako egitarau zabalarekin

Arabako, Bizkaiko eta Gipuzkoako foru aldundiek batera antolatzen dute Udalekuak 2024 udako kanpaina, zeinen bidez jolas eta hezkuntza programa zabala eskaintzen zaien Euskadiko ume eta gazteei.2024ko kanpaina honetan, hiru lurralde historikoetako 4.203 haurrek parte hartuko dute, plaza kopuru berarekin (iaz baino 210 gehiago), 1.695 Araban, 1.498 Bizkaian eta 1.010 Gipuzkoan, 7 eta 13 urte bitarteko haurrentzat. Udalekuak uztailaren 1etik 29ra egingo dira, biak barne.

Ana del Val Arabako Kultura eta Kiroleko foru diputatuak eta Gazteriaren Foru Erakundeko presidenteak, Leixuri Arrizabalaga Bizkaiko Euskara, Kultura eta Kiroleko diputatuak eta Isaac Palencia Gipuzkoako Gazteriako zuzendariak aurkeztu dute gaur goizean.

Ana del Valek azaldu duenez, "programa hau garrantzi handikoa da; izan ere, haren helburu nagusia da haurrei bizikidetzarako jolas espazio bat eskaintzea, non beren autonomia pertsonala sendotuko duten, jarduera eskaintza anitz eginez, hala nola ingurumenekoak baserri eskoletan, kirolekoak (piraguismoa, mendi ibilaldiak edo bela) edo jolasekoak (jokoak, txangoak edo lantegiak), hau da, aukera handia haurrentzat".          

Leixuri Arrizabalagak azpimarratu duenez, "euskara, kultura eta kirola sustatzea funtsezkoa da bizikidetza aberasgarrirako, garapen pertsonal eta kolektibo osorako eta kohesio sozial handiagorako. Izan ere, udalekuak, urtez urte, helburu horiek txiki-txikitatik lortzeko funtsezko tresna dira". Bizkaiko foru diputatuak nabarmendu duenez, "aurten ere, gure kultura eta kirol nortasuna islatzen duten jarduerez betetako programa zabala eskaintzen du Udalekuak kanpainak. Haurrak gure historiara eta tradizioetara modu naturalean hurbiltzea nahi dugu, esperientzia ludiko eta dibertigarrien bidez".

Bestalde, Isaac Palenciak adierazi duenez, "poz-pozik gaude berriz ere Udalekuak 2024 programa aurkeztearekin; izan ere, programazio zabala eskaintzen die Euskadiko haur eta gazteei. Aurtengo edizioan, Gipuzkoak 1.010 plaza eskaintzen ditu, udaleku hauetan 7 eta 13 urte bitarteko haurrei eskaintzen zaien esperientzia aberasgarriari lagunduz. Jarduera horiek entretenimendua ez ezik, funtsezko balioak ere sustatzen dituzte, hala nola bizikidetza, errespetua, bizitza osasungarria eta ingurumenaren zaintza. Askotan beste adin talde batzuei lehentasuna ematen zaien une honetan, funtsezkoa da gogoratzea garrantzitsua dela gure gazteei aukera esanguratsuak eskaintzea eta gizartean duten eginkizuna aitortzea".

Udalekuak 2024 hiru lurraldeetako 16 instalaziotan egingo da. Gipuzkoako Foru Aldundiak jarduerak eskainiko ditu Orio, Zarautz, Hondarribia, Arantza, Abaraxka eta Bertizko instalazioetan; Bizkaiak, berriz, zazpi eguneko egonaldiak eskainiko ditu Gorliz, Lapurriketa (Dima), Lurraska (Ajangiz), Zugaztieta (Trapagaran), Meakaur (Morga), Legasa (Bertiz. Arana) eta aurten Gorozika gehitzen da. Eta Arabako Foru Aldundiarenak hiru instalazio jarriko ditu Udalekuak 2024ren esku: Barria, Zuhatza eta Espejo. Instalazio horietan guztietan hiru lurraldeetan erroldatutako haurrek parte hartu ahal izango dute, aldundien artean plazak trukatzeko aukerari esker, eta parte hartzaile bakoitzak erroldatuta dagoen lurraldean emango du izena.

Izen emateak martxoaren 13tik 22ra egingo dira; zozketak, berriz, apirilaren 15ean (Gipuzkoa), apirilaren 16an (Araba) eta apirilaren 22an (Bizkaia)