Haziak gazteen ideia lehiaketan izena emateko epea ireki du Gasteizko Udalak

Gasteizko Udaleko Gazteria Zerbitzuak Haziak gazteen ideia lehiaketaren 12 edizioa jarri du martxan, eta proposamenak aurkezteko epea apirilaren 14ra arte egongo da zabalik. Lehiaketaren bidez, 14 eta 30 urte arteko gazteek beren proiektuak garatu ahal izango dituzte laguntza teknikoarekin eta ekonomikoarekin. Gasteizko Udalak 21.000 euro bideratuko ditu ekimenera, eta proiektu bakoitzak 3.000 euroko finantzaketa jasoko du gehienez.

"Lehiaketaren helburu nagusia da gure hirirako ekarpena egingo duten proiektuetan gazteen parte hartzea bultzatzea eta aisialdi osasungarrian partaide bihurtzea. Horretarako, aholkularitza eskaintzen dugu haien ideiak garatzeko eta errealitate bihurtzeko aukera izan dezaten Gasteizko gazteentzat interesgarriak eta bideragarriak badira", azaldu du Gazteria zinegotzi Ana Lopez de Uraldek.

Haziak lehiaketa Gasteizen ikasten, lan egiten edo bizi diren 14 eta 30 urte arteko gazteei zuzenduta dago. Proposamenen formatua eta tematika libreak dira, eta era askotako gaiak jorra ditzakete: kirola, ingurumena, osasuna, sorkuntza eta berrikuntza, komunikazioaren teknologiak, hezkuntza ez-formala, feminismoak, elkartasuna, kulturartekotasuna, euskara eta abar. Formatuari dagokionez, lantegiak, sorkuntzarako guneak, horma irudiak, proiekzioak, emanaldia, ikus-entzunezko film laburrak eta abar izan daitezke. Ideia irabazleak udal teknikariek osatuko duten epaimahaiak aukeratuko ditu.

Haziak egitasmoaren aurreko 11 edizioetan 200 proiektu baino gehiago aurkeztu eta haietako 100 baino gehiago gauzatu dira. Proiektuek hiriko gazteria anitza dela eta premia ezberdinak dituztela erakusten duten interes ugari bildu dituzte.

Lehiaketaren lehen fasean, proposamenak aurkeztu beharko dira apirilaren 14ra arte (egun hori barne), haziak@vitoria-gasteiz.org helbide elektronikoan. Proiektuak aurkezteko epea amaitzen denean, lan kolektiboko saioa egingo da pertsonak eta aurkeztutako proiektuak ezagutu ahal izateko; apirilaren 19an egingo da, eta, proiektua baloratzeko garaian, bertara joan izana kontuan hartuko da.

Lan saioaren ondoren, parte hartzaileek proposamenak berriro lantzeko eta berriro lehiaketara aurkezteko aukera izango dute. Horretarako, gehienez lau egun izango dituzte, eta aipatutako helbide elektronikora bidali beharko dira. Azkenik, behin betiko proiektuak aurkeztu ondoren, epaimahaiak erabakia emango du.