Vital Fundazioaren Astearte Musikalek Eclectic Piano bikotearen kontzertua eskainiko dute, Tchaikovskyren Intxaur-kraskagailua besteak beste

Eclectic Piano bikotea kontzertuaren esperientzia berritua eskaintzeko kezka artistikoetatik sortu da, kontzertua sorkuntzarako espazioa izan dadin. Francisco Fierro eta José Ramón García piano-jotzaileek osatzen dute taldea. Musikari bi horiek Estatu Batuetan master ikasketak egiten ari zirela ezagutu zuten elkar. Bere musika-jarduerak piano bi eta lau eskutarako errepertorio adierazgarriena hartzen du barne, baita orkestrarako jatorrizko obren transkripzioak ere. Hala ere, zigilu pertsonal gisa, biek sortzen dituzte obra originalak, baita musika klasiko eta herrikoiaren obra enblematikoen moldaketak ere. 

Francisco Fierrok Bradshaw and Buono International Piano Competition-eko Lehenengo Saria jaso zuen New Yorken, eta 2015eko maiatzean egin zuen debuta Carnegie Halleko Weill Recital Hallen delakoan. Bere musika heziketa berandu hasi zen, 12 urte zituela, El Escorial-eko Kontserbatorioan. Beka bat jaso ondoren, Houstonera joan zen, Josu de Solaun piano-jotzailearen estudiora, funtsezko zutabea bere bizitza musikalean. 2020tik irakasle egoiliarra da Musika Arts Madril Goi Mailako Eskolan eta gaur egun Alicia de Larrocha Nazioarteko Musika Jaialdiko zuzendari artistikoa da.

José Ramón Garcíak Espainian eta Estatu Batuetan garatu du bere karrera musikala, eta herrialde horretan egin ditu masterreko eta doktoregoko ikasketak arte musikaletan. Txikitatik, estatuko eta nazioarteko hogeita hamar piano lehiaketa baino gehiagotan saritu dute. Bere kontzertu-jarduerak bakarkako piano errezitaldiak, ganbera-musika eta orkestrako bakarlari emanaldiak biltzen ditu, hala nola Texasko Unibertsitateko Orkestra Sinfonikoarekin egindakoak (Austin, AEB).

Astearte Musikaletako kontzertu honetarako aukeratutako programa honek taldearen printzipio argietako bati jarraitzen zaio: ñabardura, kolore, soinu-profil eta tinbre desberdinen bilaketa, eta orkestra-soinuaren imitazioa. Francisco Fierrok eta José Ramón Garcíak idatzitako lanak berariaz piano biko taldeentzako idatzi eta diseinatu badira ere, gainerako lanak orkestra-talde handirako sortu ziren. Horregatik, programaren atal bakoitzera hurbiltzeko moduan dauden antzekotasunak eta desberdintasunak interesgarriak dira. 

Errezitaldi honen lehenengo obra Francisco Fierro pianistak idatzi zuen 2022an eta Eclectic Piano bikoteak estreinatu zuen Kordobako Rafael Orozco Nazioarteko Jaialdian. Kutsu inpresionista eta post-erromantikoa duen lan koloretsua da. Hiru eszena edo alegiazko parajetan zeharreko ibilaldia, hausnarketara eta harmonien aberastasuna zehaztasunez entzutera daramatenak. Ondoren, garai guztietako musika literaturako lan ospetsuenetako bat taularatuko da: Tchaikovskyren Intxaur-kraskagailuaren suitea. Dantza ugariren konpilazio ospetsu hori Nicolas Economou pianojole zipretar handi zenak moldatu zuen. Obra horren moldaketarik interpretatuena da gaur egun.  

Aaron Coplanden Danzon Kubatarrarekin jarraituko dute. Piano bitarako konposizio originala da, 1942an idatzia eta izen bereko genero kubatarrean inspiratua. José Ramón García pianistaren parafrasia etorriko da jarraian, Arno Babajanyan armeniar konpositore handiak Aram Khachaturian herrikide eta adiskideari eskaini zion elegia ospetsuari buruz. Obra horrek ekialdeko eta eslaviar kutsua duen Armeniako herri sonoritatearen mundu liluragarrian murgilduko du publikoa; amaitzeko, Sergei Rachmaninov errusiar konpositorearen obra gailenetako bat: Dantza Sinfonikoak Op. 45, 1940an idatziak. Azken lan hori sinfonismorako edo orkestra-soinurako hurbilketa argia da, kasu honetan piano biko taldeak burutua. Kontatzekoa da pieza orkestrarako nahiz piano birako idatzi zela aldi berean.  

Sarrerak 8 euroko prezioan izango dira eta Vital Fundazioaren egoitzan eros daitezke (Kordoi Etxea, Aiztogile kalea 24), astelehenetik ostegunera 08:30etik 14:00etara eta 16:30etik 19:00etara, eta ostiraletan goizez baino ez, baita www.fundacionvital.eus webgunearen bidez ere, edo aretoko leihatilan, emanaldia hasi baino ordubete lehenagotik aurrera, sarrerarik salgai balego.