Irundik Baionara, Korrikaren 23. edizioak 2.700 kilometrotik gora beteko ditu Euskal Herri osoan zehar hamaika egunetan. Martxoaren 14an, ostegunarekin, 15:59an abiatuko da lekukoa Irungo San Juan plazatik, eta erreleboek ez dute etenik izango martxoaren 24ko 12:30etan, igandearekin, Baionara iritsi arte.
1980an sortu zen Korrika, eta aurtengoan hamaika egun eta hamar gau emango ditu zazpi herriak zeharkatzen, “Harro Herri” lelopean, euskaldunok euskararekiko dugun harrotasuna aldarrikatuz. Azterketak Euskaraz taldea omenduko dute aurten, eta Ibilbide guztia Korrikaren Android eta iOS aplikazioan dago eskuragarri.
Irundik irten eta Hondarribira abiatu ondoren, AEK-k antolatutako euskararen aldeko lasterketa Iparraldera sartuko da Hendaiatik, Lapurdiko herriak zeharkatzeko, Donibane Lohitzune mugarri nabarmen izango delarik.
Iruñean, hilaren 16an
Ostirala, hilak 15, goizaldean, Aiherratik sartuko da Korrika Nafarroa Beherera, eta eguerdira bitartean handik eta Zuberoatik ibiliko da. Donibane Garazi eta Baigorri zeharkatu ondoren, Baztango haranera abiatuko da Izpegiko mendatean barrena, eta, ondoren, Artesiaga gainetik, Nafarroako Pirinioetara iritsiko da, han ibiliko delarik ostirala, hilaren 15etik, larunbata 16 arte. Zangozako eskualdeak larunbatarekin, hilak 16an, hartuko du lasterketa, eta, Pirinioetan beste sartu-irten bat egin eta gero, Iruñerrira iritsiko da, Iruñera Mendillorritik sartuko delarik 14:19an.
Gasteizera, hilaren 18an
Nafarroako hiriburutik pasa ondoren, hegoalderantz joko du Tafalla eta Erriberatik, Tuterara iristeko hilaren 17an, igandea, 12:23an. Astelehenean, hilak 18, iparraldera joko du Lizarratik, Kanpezun barrena Araban sartzeko. Egun osoan zehar, Arabako Errioxan, Trebiñu Añanan eta Gorbeialdean ibiliko da lekukoa, 19:30ean Abetxukotik Gasteizera iritsi aurretik.
Lautada izango da hurrengo helmuga, asteartean, hilak 19, Nafarroako Sakana, Larraun eta Ultzamara zeharkatzeko. Eta behin eguna ondo aurreratuta, 20:09an, Gipuzkoa zapalduko du berriro Hernanin, Goizuetatik datorren errepidetik behera etorrita. Buruntzaldea, Urola Kosta, Urola Garaia eta Debagoienatik pasako da orduan Korrika, Elgetatik Bizkaira sartu, eta Debabarrenera itzuliko da Eibartik. Mutriku izango da Gipuzkoako azken jomuga, asteazkenean, 14:56an, lasterketak Ondarroatik Bizkaira jo aurretik.
Ostegunean, hilak 21, Bizkaian
Ostegunean, hilak 21, Korrikak Bizkaia zeharkatzen emango du egun osoa; Lea-Artibai, Busturialdea, Uribe Kosta eta Txorierritik pasa, eta Abusu auzotik iritsiko da Bilbora 15:50ean. Bilboko kale eta auzoetatik ibilbide luzea egin eta gero Ezkerraldera eta Enkarterrira abiatuko da, ostiralean, hilak 22, Aiara haranetik Arabara itzuliz. Ostiral horretan bertan, lasterketa Bizkaira itzuliko da Arratia eta Durangaldea zeharkatzeko, eta, Araban sartu-irten labur bat egin ondoren, larunbatean, hilak 23, Gipuzkoara itzuliko da Leintz Gatzagatik. Azken-aurreko egun horretan, Korrikak ia puntatik puntara zeharkatuko du Gipuzkoa, Eskoriatzatik Oiartzunera, Debagoiena, Goierri, Tolosaldea, Buruntzaldea eta Oarsoaldea zapalduz.
Azken aurreko egunean pasako da Donostiatik
Donostiako ibilbidea larunbatean hasiko da, 18:12an, Martutenen, eta, bitxikeria gisa, lasterketa bigarrenez igaroko da Hernanitik eta Urnietatik, asteartean, hilaren 19an, bertan izan ondoren. Oiartzundik, Aritxulegiko eta Agiñako gainetatik Nafarroarantz jarraituko du Korrikak, Saratik Lapurdira itzuli, eta Senpere eta Biarritzetik azken jardunaldiari ekiteko, Baionako Askatasunaren Plazan amaitu arte. Puntu honetan, behin lekukoak gordetzen duen mezua irakurri ondoren, jai ederra ospatuko da, Korrikari amaiera alaia emanez.
