Kultura Etxeak "Mobilizatu giza eskubideen alde! Mugi zaitez!" erakusketa hartuko du

 Ignacio Aldecoa Kultura Etxeak "Mobilizatu giza eskubideen alde! Mugi zaitez!" erakusketa hartuko du gaurtik urtarrilaren 8ra arte.

"Ba al dakizu dagoeneko 75 urte bete direla Giza Eskubideen Aldarrikapen Unibertsala onetsi zenetik?", galdetzen diote beren buruari erakundeko kideek. Ibilbide luzea izan duen arren, oraindik pertsona askori urratzen zaizkio bere eskubideak egunero mundu osoan, baita gugandik gertuen dagoen testuinguruan ere. Horregatik, Nazio Batuen Batzar Nagusiak 1948an onetsi zuenean bezain egokia da oraindik ere aldarrikapen hori.

Giza Eskubideen Aldarrikapen Unibertsalaren 75. urteurrenaren esparruan, eta Nazio Batuen Giza Eskubideetarako Goi Komisarioaren Bulegoaren #Standup4humanrights kanpainari laguntzeko, UN Etxea UNESCO Sustatzeko Euskal Herriko Elkarteak Ane Pikaza euskal artistak ilustratutako erakusketa ibiltari honen sorrera bultzatu du.

Erakusketaren helburua da giza eskubideak sexu eta kultura dibertsitatearen eta dibertsitate funtzionalaren ikuspegitik bultzatzea, ikusleen konpromisoa eta ekintza sustatuz.

"Pertsonen oinarrizko eskubide eta askatasunak ezagutu, haiei buruz hausnartu eta haiek betetzeko konpromisoa hartzera gonbidatzen zaitugu, baita gizarte bidezko eta askotarikoen eraikuntzaren parte izatera ere", adierazi du UN Etxeak.

UN Etxearen ekimena da, Amesten, Mujeres con Voz eta Naizen elkarteekin lankidetzan gauzatua. Eusko Jaurlaritzako Giza Eskubide, Biktima eta Aniztasun Zuzendaritzaren eta Bizkaiko Foru Aldundiko Lankidetzarako eta Aniztasunerako Zuzendaritza Nagusiaren babesa du, eta Arabara iritsi da, Foru Aldundiko Kultura eta Kirol Sailaren bidez.