Araba, helmuga turistiko gisa udan

Uda beti da garai ona turistaz betetzen diren hotelentzat. Baina uda honetan bereziki lagundu du Arabako nahiz Euskal Autonomia Erkidegoko hotelen egoera hobetzen, aurreko udetan koronabirusaren pandemiak eragindako kolpearen ondoren. Hala erakusten dute, halaber, Euskal Estatistika Erakundeak emandako azken datuek –Eustat– eta azken txostenean adierazten dutenez, Araba, Bizkaia eta Gipuzkoako hoteletako sarrerak %31 baino gehiago igo dira eta ostatu-gauak %35 inguru.

Hala, 2022ko uztaileko hotelak jasotzen dituzten establezimendu turistikoei buruzko inkestaren arabera, joan den hilabetean hoteletako sarrerak asko handitu ziren, Euskadi helmuga turistiko gisa aukeratzen duten turistei esker. Izan ere, bai Bilbo, bai Araba eta Gipuzkoa turista asko erakartzen dituzte udan, eta horren erakusgarri da euskal hoteletako turisten hazkunde handia. Zenbakitan, uztailean, Euskal Autonomia Erkidegoko hoteletako sarrerak %31,2 igo ziren, eta gauak %34,8, urtetik urtera. Guztira, sarrerak 383.186 igo dira (guztira 766.020 dira gaualdiak). “Guztira 383.186 sarrera izan dira, zeintzuek 766.020 gaualdi ekarri baitituzte. 2019ko uztailean, covid-19aren aurretik, zifra horiek txikiagoak izan ziren: 328.080 sarrera eta 692.414 gaualdi. Sarrera guztien % 49,6 eta gaualdien %50,3 atzerritarrenak izan dira 2022ko uztailean (2021eko uztailean sarreren % 33,0 eta gaualdien %31,0 izan ziren), atzerritar jatorriko pertsonen sarrera eta gaualdi kopuruak gora eginda (%97,2 eta %118,9, hurrenez hurren). Estatuko pertsonen sarrerak zein gaualdiak, aldiz, pixka bat jaitsi dira urte arteko datuetan: %1,4 eta %3,0, hurrenez hurren”, azpimarratu dute txostenean. Zehatzago esanda, joan den hileko hotel-establezimenduetako sarreren %13,5 Araban daudela. Hau da, joan den hilean ia 384.000 sarreretatik 51.567 izan ziren lurralde honetan. Kopuru horretatik, 28.661 turista Espainiakoak ziren eta 22.906 atzerrikoak. Gainerako lurraldeetan, nabarmentzekoa da Bizkaian %45,4 dela eta Gipuzkoan %41,1. “2022ko uztailean hotel-establezimenduetako sarreren %13,5 Araban, %45,4 Bizkaian eta %41,1 Gipuzkoan izan dira. Gaualdiei dagokienez, Araban 91.912 gaualdi zenbatu dira, guztizkoaren %12,0; Bizkaian 336.969 gaualdi, guztizkoaren %44,0; eta Gipuzkoan 337.139 gaualdi, Euskal AE osoan erregistratutakoen %44,0 halaber”, gaineratu dute. Hala, balantze positibo hori Araban eta Euskal Autonomia Erkidegoan erregistratu da, iazko hilabete berarekin alderatuta. Hau da, uztailean, hotelen egoera nabarmen hobetu da Euskadiko hiru lurralde historikoetan, bai hoteletan erregistratu diren sarreretan, bai turistek igaro dituzten gauetan. Sarrera kopuruari dagokionez, Bizkaiak %41,3ko urte arteko hazkundea izan du, Gipuzkoak %25,4koa eta Arabak %19,1ekoa. Gaualdiei dagokienez, urte arteko aldakuntzak %41,9koa izan dira Bizkaian, %32,2koa Gipuzkoan eta %20,9koa Araban. Hiriburuetan, urte batetik bestera, sarreren kopurua %47,5 igo da Bilbon, %27,9 Gasteizen eta %22,8 Donostian. Antzera, gaualdiek gora egin dute Bilbon (%47,3), Donostian (% 35,8) eta Gasteizen (%32,5). 2022ko uztaileko batez besteko egonaldia 2,00 egunekoa izan da Euskal AEn, 2021eko hil berekoa baino handiagoa, orduan 1,95 egunekoa izan baitzen. Era berean, txosten honetan, plazen arabera neurtuta %72ra iritsi diren okupazio-mailak ere zehazten dira, eta %80,8 gelaka neurtuta. Iazko epe berari dagokionez, igoerak hamalau puntu por-tzentualekoak eta 17,3koak izan dira, hurrenez hurren: “2022ko uztaileko okupazio-mailak %72,0ra iritsi dira Euskal AE osoan, plazaka neurtuta, eta %80,8ra logelaka neurtuta. 2021eko uztailaren ondoan, igoerak ehuneko 14,4 eta 17,3 puntukoak izan dira, hurrenez hurren”.

“Errentagarritasuna, ADRren bidez neurtua (eguneko batez besteko tarifa), 118,30 eurokoa izan da Euskal AEn 2022ko uztailean; hau da, %26,7ko igoera izan da aurreko urteko uztailaren aldean. ADR 150,22 eurokoa izan da Gipuzkoan, 97,29 eurokoa Bizkaian eta 83,74 eurokoa Araban. Hiriburuen arabera, aldeak handiagoak dira; izan ere, ADR 193,86 eurotan kokatu da Donostian, 107,15 eurotan Bilbon eta, azkenik, 70,50 eurotan Gasteizen”, azpimarratu dute. “RevPar (gela eskuragarriko batez besteko diru-sarrerak) 95,53 eurokoa izan da Euskal AEn2022ko uztailean, aurreko urteko hilabete berean baino %61,0 gehiago. Hotelen ETHIren estaldura %84,2koa izan da uztailean. Eustatek eskerrak ematen dizkie inkesta honetan parte hartu duten establezimendu guztiei”, ondorioztatu dute.

Balorazioa

Udako hotelen egoera hobetu dela erakusten duen txosten hori jendaurrean jarri ondoren, Javier Hurtado Turismo, Merkataritza eta Kontsumo sailburuak oso positibotzat jo du uda honetan Euskadin izan den turismoa. Lekeition garatutako turismo proiektuetako aurrerapenen aurkezpenean parte hartu zuen atzo sailburuak, eta bertan balorazio positiboa egin zuen. Hala, Hurtadok nabarmendu zuen estatistikek erakusten dutela hotel-establezimenduetan hazkunde handia izan dela, eta nabarmendu zuen “nazioarteko turismoa nabarmen suspertzen dela”. Haren iritziz, “oso berri onak dira oso gaizki pasatu duen eta udarako aurreikuspenak oso datu onekin berresten ari den sektore batentzat”.