Schuberten 'Amuarraina' kintetoarekin amaituko da larunbatean Miramongo Matineeak zikloaren 2025-2026 denboraldia

Euskadiko Orkestrak antolatzen duen Miramongo Matineeak ganbera musikako zikloaren 2025-2026 denboraldiko azken kontzertua izango da larunbatean, ekainaren 6an, eta Miramon Ensemble taldeak eskainiko du, 'Uraren islak' izenburupean, Franz Schuberten 'Amuarraina' kinteto ezaguna interpretatuz.

Euskadiko Orkestrak jakinarazi duenez, taldeak bost interprete ditu, eta horietako lau bere kideak dira: Larraitz Oiartzabal (biolina), Delphine Dupuy (biola), Juan Ignacio Emme (biolontxeloa) eta Mehmet Sönmez (kontrabaxua). Itxaso Sainz de la Mazak osatzen du taldea pianoarekin.

Bada, denboraldiko azken kontzertuan, ganbera musikaren maisu handienetako eta historiako konpositore emankorrenetakoa den Franz Schuberti omenaldia egingo zaio, eta Miramon Ensemblek ganbera errepertorioko obrarik ospetsu eta maitatuenetako bat interpretatuko du: 'Pianodun kintetoa la maiorrean, D.667', mundu osoan 'Amuarraina' bezala ezagutzen dena.

Lanaren jatorria Schubertek 1817an Christian Friedrich Daniel Schubarten poema baten gainean konposatutako 'Die Forelle' ('Amuarraina') liedean dago. Abestiak berehala lortu zuen ospe handia, bere freskotasun melodikoari eta konpositoreak uraren mugimendua eta amuarrainaren bizitasuna gogora ekartzeko duen fintasunari esker. Pieza horrekin liluratuta, Sylvester Paumgartner mezenas eta biolontxelo jotzaile amateurrak ganbera lan bat enkargatu zion Schuberti, hain ezaguna zen motibo hura sartzeko.

Horrela sortu zen 1819an kinteto hau, formazio ezohikorako idatzia -biolina, biola, biolontxeloa, kontrabaxua eta pianoa-, obrari sonoritate argitsu eta gardena ematen diona. Liedaren motibo ospetsua eraldatuta agertzen da laugarren mugimenduan, bariazio joko fin bihurtuta. 1829an hil ondoren argitaratua, 'Amuarraina' ganbera musika osoko konposizio miretsi eta enblematikoenetako bat bezala finkatu da.

Kontzertua 11:00eta hasiko da, Euskadiko Orkestraren Miramongo egoitzan, eta sarrerak 11 euroan daude salgai euskadikoorkestra.eus webgunean eta Kursaal Auditoriumeko leihatilan; gainera, orkestraren egoitzako leihatilan bertan ere erosi ahal izango dira kontzertuaren egunean, leku librerik geratzen bada.