EAEn 1.247 ezkontza izan dira 2025eko lehen hiruhilekoan, iaz baino %16,8 gehiago

Euskal Autonomia Erkidegoan (EAE) 1.247 ezkontza izan dira 2025eko lehenbiziko hiruhilekoan, hau da, aurreko urteko hiruhileko berean baino %16,8 gehiago, orduan 1.068 izan baitziren, Eustat euskal estatistika erakundeak astelehen honetan jakinarazitako datuen arabera.

Lurraldeka, Bizkaian 602 ezkontza erregistratu dira, duela urtebete baino %15,3 gehiago; Gipuzkoan 440 izan dira, %23,9 gehiago, eta Araban 171, %20,4 gehiago. Gainerako 34 ezkontzak EAEtik kanpo erregistratu dira -aurreko urtean baino % 30,6 gutxiago-.

Ezkontza guztietatik 1.198 sexu desberdineko pertsonen artekoak izan dira (%96,1), eta 49 sexu bereko pertsonen artekoak (%3,9) -29 gizonen artekoak eta 20 emakumeen artekoak-. Ezkontza zibilak guztizkoaren %98 izan dira, iaz %97,8 izan ziren bitartean.

HILABETEEN ARABERA

Hilabeteen arabera, ezkontzen kopuruak gora egin du hiru hilabeteetan, igoerarik handiena martxoan izan zen arren, %29,2koa. Urtarrilean eta otsailean ezkontzak %6,3 eta %7,8 igo ziren, hurrenez hurren.

Urteko lehen hiruhilekoan izandako 1.247 ezkontzetan, bizilekua EAEn duten 1.214 gizon eta 1.197 emakume ezkondu dira; gainerako ezkontideak kanpoan bizi dira.

Bestalde, 977 senarrentzat lehen ezkontza izan da (%80,5), eta 222 dibortziatu eta 15 alargun berriro ezkondu dira. Lehen aldiz ezkondu diren emakumeen portzentajea gizonena baino handiagoa izan da, 985 emakume ezkondu baitira (%82,3); ezkondutako dibortziatuak 200 izan dira, eta ezkondutako alargunak 12.

Ezkontideak adinaren arabera sailkatuz gero, ikus daiteke senarren %90,4k 30 urte edo gehiago dituela; emazteen artean, berriz, %85,4ra jaisten da ehuneko hori. Aurreko urteko aldi berarekin alderatuta, proportzio hori jaitsi egin da, bai gizonezkoetan (2024an %90,8), bai emakumezkoetan (2024an %86).

Azkenik, emakumezko ezkonberrien %17 eta gizonezko ezkonberrien %15,7 atzerriko nazionalitatekoak izan dira 2025eko lehen hiruhilekoan. Proportzio hori jaitsi egin da 2024ko aldi berarekin alderatuta, bai emazteen kasuan, bai senarren kasuan, aldi hartan %20,1 eta %16,3 izan baitziren hurrenez hurren.