Gasteizko Udalak 2025-2026 ikasturtean euskara ikasteko programatutako eskaintza aurkeztu du asteazken honetan, Arabako Foru Aldundiaren laguntzarekin, eta orotara 820 plaza eskainiko ditu gurasoei, 55 urtetik gorakoei, atzerritarrei eta merkataritzako eta ostalaritzako langileei zuzendutako ikastaroetan. Eskolak euskaltegiek emango dituzte gizarte etxeetan, BIZAN sarean eta hiriko zenbait ikastetxetan, eta ikasle berriak irailaren 8tik 17ra bitartean matrikulatu ahal izango dira herritarrei laguntzeko bulegoetan.

Ikasturte berrirako matrikulazio kanpaina Izaskun Arrue Kulturgunean egindako prentsaurrekoan aurkeztu dute, Euskara arnasgune bihurtu' lelopean. Bertan izan dira Maria Nanclares Gasteizko Udaleko Euskara zinegotzia, Iñaki Gurtubai Arabako Aldundiko Berdintasun, Euskara eta Gobernantzako diputatua eta Rakel Larrazabal Udaberria euskaltegiko zuzendaria.

Azaldu dutenez, aurreko ekitaldietan eskainitako lau ikastaro modalitateei eutsiko zaie aurten. Horrela, gurasoentzako ikastaroetan, familiaren baitako hizkuntzarekin lotutako alderdi praktikoak ikasiko dituzte eta seme-alaben eskolako ikasketa indartu ahal izango dute. HABEk homologatutako 170 orduko ikastaroak izango dira eta gizarte etxeetan eskainiko dira, pertsona bakoitzaren etxetik gertu. Gainera, kontziliazioa errazten duten ordutegiak izango dituzte.

Ikasturte osoko matrikula arruntaren prezioa 156,60 euro da, eta matrikula murriztua 124,20 euro ikasle berrientzat eta aurreko ikasturtean %80ko asistentzia edo handiagoa izan zutenentzat; langabeen kasuan, gainera, %15eko hobaria gehituko da.

55 urtetik gorakoentzako ikastaroei dagokienez, hizkuntza zerotik ikasten hastea eta eguneroko bizitzan moldatu ahal izateko lehen ezagutzak barneratzea ahalbidetuko dute. 13 ikastarotik lau BIZAN sareko zentroetan eskainiko dira (Abetxuku, San Martin, Txagorritxu eta San Prudentzio). Ikastaroaren kostua 54,40 euro izango da.

Jatorri atzerritarra dutenentzako euskarazko ikastaroetan oinarrizko hiztegia ikasiko dute ikasleek, eta hiru talde izango dira Landatxo gizarte etxean eta Landazuri kiroldegian. Helburua da parte hartzaileek hasierako mailako (A1) taldeetan sartu ahal izatea ikastaroa egin ostean. Matrikularen prezioa 10,10 euro da hiruhileko bakoitzeko (60 ordu).

BESTE DATU BATZUK

Azkenik, merkataritzan eta ostalaritzan lan egiten dutenentzako ikastaroetan, ahoz komunikatzen eta establezimendurako informazio idatzia prestatzen ikasiko dute, hala nola errotuluak, eskaintzak eta oharrak, beste batzuen artean. Hasierako maila eta eskolatze prozesua euskaraz egin dutenentzako beste ikastaro bat ere eskainiko da. Matrikula 50,10 euro izango da (60 ordu/lauhilekoa), eta egun langabezia egoeran egonez gero, %15eko hobaria aplikatu ahal izango da.

Ikastaroak antolatzeaz gain, euskara ikastea sustatzeko laguntza ekonomikoak ere eskainiko ditu Gasteizko Udalak. Aurten, helburu horretara bideratutako aurrekontu saila 150.000 eurokoa da eta 568 eskaera jaso dira.