Arabako Foru Aldundiko Enplegu, Merkataritza eta Turismo Saila AA adimen artifizialaren erabilera enplegurako prestakuntzaren metodologian eta materialetan irizpide etiko eta inklusiboekin txertatzeko Europako proiektu baten buru izango da datozen bi urteetan. "INclusive TrAIners" proiektuak 250.000 euroko aurrekontua du.
Proiektu hori garatuko duen partzuergoa, Arabako Foru Aldundiak eta beste hauek osatzen dute: Cnpipa Puglia (Italia), behartsuentzako lanbide heziketako erakundea; Sparkling Intuition (Portugal), hezkuntzako eta prestakuntzako software enpresa; Malopolska Izba Samorzadowa (Polonia), helduen prestakuntzarako eta AAko soluzioak garatzeko fundazioa; Media Creativa (Espainia), hezkuntza berrikuntzako zentroa, eta Folkuniversitetet (Suedia), helduen hezkuntzako elkartea.
Enplegu, Merkataritza eta Turismo Saileko foru diputatu Cristina Gonzálezek azpimarratu du ezen AAren bilakaera azkarra hezkuntza eta lan merkatua eraldatzen ari dela, eta azaldu du "INclusive TrAIners" proiektuak testuinguru horretan bilatzen duena dela "etengabeko lanbide heziketako hezitzaileak adimen artifizialaren erabilera etikoan gaitzea, haien zeregina funtsezkoa baita enplegagarritasunerako gaitasunak garatzeko".
"Helburu nagusia da ziurtatzea AAren erabilera prestakuntzan bidezkoa, gardena eta inklusiboa izango dela, lan merkatuan desparekotasunak areagotu ditzaketen alborapenak errepikatzea saihestuz", gaineratu du.
Proiektu horrek, zeina EBko Erasmus+ Programak finantzatu baitu, lan tresna sorta bat garatuko du, hauexek barne hartzen dituena: prestakuntza baliabide irekien plataforma bat, laborategi birtual bat eta adimen artifizialeko baliabide banku bat prestakuntzako profesionalentzat. Proiektua abiarazteko nazioz gaindiko lehenengo bilera datorren azaroan izango da, Gasteizen.
"INclusive TrAIners" proiektuaren helburua da prestatzaileak trebatzea AAko sistemekin modu positibo, kritiko eta etikoan elkarreragiteko, eta AAk bultzatutako hezkuntza materialak garatzea, ekitatea sustatzeko gizarte eta lan ibilbideen garapenean. Haren beste helburuetako batzuk dira prestatzaileek AAren arloan dituzten eskumenei buruzko gogoeta egin dezaten sustatzea eta AAren jardunbide egokiei buruzko prestatzaileen komunitate bat sortzea.
Hala, proiektuaren asmoa da "inpaktu eraldatzailea" lortzea Lanbide Heziketako ekosisteman, prestatzaileei tresnak emanez beren lanean AAko tresnak modu etikoan txertatzeko trebetasun praktikoak eskuratzeko, enplegua bilatzen dutenei orientazio pertsonalizatuagoa eta efizienteagoa eskaintze aldera. "INclusive TrAIners" proiektuak Europar Batasunaren balioekiko atxikimendua berresten du.
